Reuerendis dominis et in christo dilectis domino Hainrico Venerabili preposito, Friderico decano Totique Capitulo domus sancti floriani, Ordinis sancti Augustini Canonicorum Regularium, Patauiensis dyocesis, Nos Gedrudis dei gratia Abbatissa, Leucardis decanissa Totusque Conuentus Sanctimonialium in Traunchirchen deuotas orationes cum illa, que nunquam excidet Karitate, Hortatur nos ewangelium dicens: Querite et inuenietis, pulsate et aperietur vobis. Hinc est igitur, quod ad ianuam vestre clemencie pulsauimus deuocione feruenti vestram Fraternitatem postulantes et vos tamquam viri misericordiarum de thesauris vestris optimis preciosa munera obtulistis. Quid igitur pro tantis tam venerandis ac piissimis donis possumus exhibere, nisi, si sufficiat, secundum Apostolum spiritualibus spiritualia comparantes, Bona omnia vigiliarum, jeiuniorum, Orationum et aliorum studiorum spiritualium, que in domo nostra fiunt in vita pariter et in morte vobis ac succedentibus vobis deuotissime offerimus et participationem concedimus et perfectam (sic). Super addimus etiam et in singularis confraternitatis indicium nos presentibus obligamus, vt dum obitus vnius de Conuentu fuerit nunciatos, eidem sequenti die vigilias maiores et Missam pro defunctis cantando exequias deuote peragere debeamus et per decem dies continuos in Capitulo recipere disciplinam, singule etiam pro salute ipsius infra septennium psalterium legere teneantur. In cuius rei testimonium vobis damus presentes litteras sigillorum nostrorum munimine roboratas. Datum jacobi apostoli Anno domini Millesimo CCC°, XXX°. quarto.

Source Fulltext: OÖUB 6 (Wien 1972) S. 131f., Nr. 123