Der erbern geistleichen Vrowen vroun Geiseln von Winchel, der Priorinn dacz Minnpach enbeut ich Peter Moutter dacz Neunwurch meinen dienst mit trewen. Ich tuen ew chunt, daz ich den weingarten, der do haist der hofer, vnd leit in der herstell, da ir acht pfenning ze purchrecht auff habt, von notturft verchouft han den erbern herren Probst heinreichen vnd dem Goczhaus dacz sand Florian, wand ich selb zu ew nicht cho^emen mag, pitt ich ewr beschaidenheit, wer ew den prief zaig, daz ir do von den weingarten ouf nemt vnd in leicht dem Goczhous dacz sand Florian oder wen der Probst dez selben gouczhouses her zu ew an seiner stat sent, mit allem dem recht vnd ich in gehabt han.

Source Fulltext: OÖUB 6 (Wien 1972) S. 251f., Nr. 246