Nos Heinricus diuina miseracione prepositus, Fridericus decanus Totusque domus Sancti Floriani Conuentus Notum facimus vniuersis presentem paginam inspecturis, quod discretus vir Fridericus Plebanus in Santo Vito amicus ecclesie nostre et benefactor specialis inter cetera multa bona per eum nobis et Ecclesie nostre exhibita vnam vineam dictam Amerstal in Wachouia prope ecclesiam Sancti Michahelis sitam pro sua pecunia comparatam in anime sue remedium perpetuum nostro Monasterio tradidit, obtulit et donauit perpetuo possidendam condicione tali adhibita et adiecta, vt anniuersarii sui dies, qui vigiliam beati Ambrosii Episcopi occupat, tum vigiliis et Missa defunctorum, sicut aput nos fratribus nostris de conuentu et benefactoribus solet fieri, peragatur. Nos vero Heinricus prepositus, qui vineam predictam in nostram recepimus potestatem eodem die singulis annis dominis nostris de conuentu vnum talentum denariorum Wiennensium contradicione qualicumque procul mota promittimus ministrare; quod si per aliquam oblivionem uel negligenciam pretermiserimus prenotata, ex tunc Magister infirmarie, qui pro tempore fuerit, de bona nostra voluntate se de dicta vinea intromittere debet, Dominis de conuentu eodem die, sicut est prescriptum, vnum talentum denariorum annis singulis porrecturus. Ad que omnia et singula supradicta fideliter et perpetuo adimplenda nos successoresque nostros astringimus et firmiter obligamus. In cuius rei testimonium presentes damus litteras sigillorum nostrorum robore communitas. Datum in domo nostra predicta anno domini Millesimo CCCmo XLIIII. in die Benedict Abbatis.

Source Fulltext: OÖUB 6 (Wien 1972) S. 474f., Nr. 469