Ich Charel Rech von Luffenberch tuen chunt alln den, die disen prief sechent oder horent lesen, deu nu sint oder hernach chu^eftig werdent, daz ich mit wolbedachtem muet vnd nach rat meiner nachsten vreunt vnd mit gutem wiln vnd gunst meiner Hausvrawn vrawn Agnesen vnd aller meiner erben zden zeiten, do ich ez wol getuen macht, geschaft vnd geben han meinn paiden Têchter vrawn Katrein vnd vrawn Wendelmueten hincz Pullgarn in daz chlaster ze pessrung irr phruent an fu°nzk phenning drev phunt geltz, die gelegen sint auf drin gueten ze Wintpaezzing, mit sottaner beschaidenheit. daz si deselben gullt inn schulln haben vnuerchummert alain zu im paiden tagen, wann auer das ist, daz got vber se gepeutt, zo schol die vorgenant gu°llt herwider gevallen auf mich vnd auf mein nachst erben. Ich offen vnd wil auch, daz ich vnd mein erben der vorgenanten guet ze Wintpaezzing Vogt vnd Scherm schullen vnd wellen sein mit vrchund dreir Huener, die man mir vnd meinn erben jerchlich raichen schol zdem vaschtang. Wann mein paid vorgenant To^echter geistlich sint vnd sich selb nicht besorgen mogen, wil ich vnd mein erben die sorg fur sev tragen vnd in die gu^ellt inpringen an all ir mue vnd nach vnsern trewn. Daz die red vnd die wandlung staet vnd vnuerchert beleib, darvber gib Ich in disen prief versigelten mit mein Anhangunden jnsigel vnd mit Hern Otten dez Perchaymer jnsigel vnd mit Hern Larentzens Dez O^eder jnsigel. Der prief ist geben, do von Christez gepurd ergangen waren Dreutzechen Hundert jar, darnach in dem vir vnd virzkistem jar An Sand Mathias tag.

Source Fulltext: OÖUB 6 (Wien 1972) S. 469f., Nr. 464