"Ich Attakher Hawtzenperger(1), bekenn fuer mich vnd all mein eriben vnd thun kund mit dem offen briff allen den dy jn sehend oder verhornd lesen, das mein vetter Sigmund Hawtzenperger(2), dem Got genad, pey seinem lebentigen vnd woll muegen, an mich bracht hatt, wie er sich habe bedacht vnd verwilligt, sein guet zw Oegsenslag(3) mit seiner zuegehorung czw dem wirdigen gotshaws vnd kloster vnser frawn Slag cze aygnen vnd cze uermachen durich sein vnd seiner voruordern selen hayll willen jaerleich vnd ewigkleich darumb ainen jartag cze begeen, vnd pat mich, das jch yn darinn fuedrat vnd kain irrung taett oder fwerbazz machet. Da gelobt vnd versprach ich ym solhs sein aygnen oder vermachen czw dem benandten gotshaws vnd kloster cze einem ewigen jartag kain irrung cze thuen, ytz noch hinfur, vnd gab jm mit meinen handgelobten trewn gantzen willen vnd gwalt dartzw fur mich vnd all mein eriben, solh sein vermachen vnd aygnen staet vnd vntzebrochen halden vnd kain widersprechen darjn haben. Jch gelob vnd versprich auch wissentleich in kraft des briffs fur mich vnd all mein eriben vnd fur maenigkleich von vnsern wegen mit meinen trewen wider solh aygnen vnd geschaeft, so der benant mein lieber vetter Sigmund der Hawtzenperger, dem Got genad, mit dem bemelten guet zw Oegsenslag vnd seiner czugehorung, dem benanten gotshaws vnd kloster vnser frawn Slag durich sein vnd seiner voruordern selen haylwartigkait jarleich ainen jartag darumb in dem benanten gotshaws vnd kloster vnser frawn Slag cze begeen getan hatt, gantz staet vnd vntzebrochen cze halden vnd jn kain dingen ze wider sprechen, vnd vertzeihen auch vns des gar vnd gantzleich czw rechter fuertzicht, also das wir hinfuer, obgenant all, weder ytz noch hinfuer czw dem benanten gotshaws vnser frawn Slag brobst(4) vnd conuent von des bemelten guetz wegen czw Ogsenslag vnd seiner czugehoerung kainen czuspruch, ansprach, eribschaft noch gerechtigkait nymermer gehaben sullen noch wellen, weder mit recht noch an recht, trewleich angeuer. Des czw vrkund gib jch obgenandter Attakher Hawtzenperger den briff, versigelt mit meinem aygen furgedrukhten jnsigel, czw czewgen hab ich mit vleis gebeten den edlen vnd weysen Paulln den Ritzenwinkhler(5) phleger czw Liechtenaw, das er sein jnsigel fur gedrukht hat, jm vnd sein erben an schaden. Der briff ist geben nach Kristi gepurd virtzehen hundert vnd jn dem drey vnd funftzigisten jare, an suntag nach sand Jacobs tag, des heyligen tzwelfpoten."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 343 (S 233), S. 370-371