"Wir Johanns Haiden, dechannt der kayserlichen stifft vnserer lieben frawen zu Alten-Cappellen ze Regenspurg, tuen kund vnd offenlich ze wissen allen vnd iglichen, welich standts, wirdikait oder aigenschafft die sint oder genent werden, den diser gegenwuertiger vnser brieff vnd offen jnstrument erscheinet vnd furkumbt, das vor vns jn des hernach geschribnen offen notarj vnd zeugen gegenwuertikait erschinen vnd komen ist der ersam gaistlich vnd andachtig herr brueder Pernhart profess des kloster vnser lieben frawen Slag des orden von Premonstrat, Passawer bistumb, vnd pracht fur ainen vnuermailigten kaiserlichen brieff zu tewsch auff papir geschriben, anruerent den wolgeboren herren, herren Reinprechten von Walsee, haubtman ob der Enns vnd zu ruk mit ainem sigill von rotem wachs auffgetrukt mit drein schilten in ainem cirkel vnd vmbgeschrifft beslossen, welch umbgeschrifft jn jrem laut also stet ,Sigillum Friderici Romanorum Imperatoris etc. Austrie, Stirie ducis‘ etc. der dan gancz vnd gar vnvermailigt, vnuersert vnd vnczerprochen, auch an alle mail vnd makel gewesen, sunder nichtz darjn erkchennet, das arkwonikait pringen mocht. Darumb der benant brueder Pernhart mit aligunder vleissiger gepet vns gepeten hat, den selbigen kaiserlichen brieff schaffen ze fidimiren vnd exempliren vnd mit vnsers gewalt bestattung vnd decret bringen lassen jn ain offenlich form vnd gezeugnuess, damit dem selbigen vnserm fidimus vnd jnstrument an aller statt, jn vnd ausserhalb rechten gelaubt sol werden als dem benanten kaiserlichem original, sunder mit solicher zugeseczter vrsach, das der benant kaiserlich brieff so weitt vber lanndt, wetter vnd wasser halben jn verderblichait komen mocht, des dan das benant gotshaws vnser lieben frawen Slag zu grossem schaden komen mocht. Wann aber wir obgenanter Johanns techannt fuergenomen haben, das solich gepet mit gewoendlichen vnd pillichen vrsachen geleich der vernunfft stenn, haben wir den benanten kaiserlichen brieff mit sampt vnsrem hernach geschriben offen notari vnd auch zeugen mit ganczen vleyss besicht vnd befunt gancz vnuersert vnd an alle makel vnd mail zu diser zeit gefunden, darauff wir beuolhen vnd durich den selbigen vnsren hernach geschriben offen notari gepoten haben, den selbigen brieff fidimieren, transsumieren vnd jn disew gegenwuertiklich offenlich jnstrumentlich form machen vnd seczen, nichts darjnnen wandlen, meren oder ze mindren, das den sin oder verstentung des tenor verrukchen moecht. Auch vnser decret vnd gwalt darinn vnd darunder gelegt vnd bestaett haben, legen, seczen vnd bestaetten auch gegenburtiklich mit krafft vnsers gegenwurtigen brieff vnd jnstrument, damit dem furan so hoch vnd vil gelaubt sol werden, jn vnd ausserhalb rechten, als dem benanten kaiserlichem original, nachdem wir die paide von wort ze wort gleich lauttent gefunden haben. Der tenor aber des bemelten kaiserlichen original lautt von wort ze wort also:||
||
,Wir Fridreich [...] jare.‘ [Urk 451 vom 14.1.1474]||
||
Die vndergeschrifft lautt also ,Commissio domini imperatoris in consilio‘. ||
||
Solicher aller obgeschriben sachen waraer geczeugnuss geben wir durich den oben vnd hernach geschriben vnsern offen notarj, disen brieff vnd jnstrument mit vnserem aigen anhangunden jnsigel, vnd ist geschehen jn der gemain stuben vnser gewondling hoff vnd wonung zu Regenspurg, jn dem jar nach Cristi geburd tawsend vierhunderdt vnd jn dem viervndsibenzigisten jar an freitag der da gewesen ist der vierdt tag des monedts februarij vmb mittentag vnd dapey, do das heilig Romisch reich regirt der allerdurichlewchtigist furst vnd herr, herr Fridreich, aus gottlicher fursechung Romischer kayser, zu allen zeitten meraer des reichs, herczog ze Osterreich, ze Steyr etc. seiner kaiserlichen wird jm zwayvndzwaynczigisten jare. Da pey gewesen sind der hochgelert wirdig vnd ander ersam gaistlich herren, maister Kaspar der heiligen gaistlichen rechten doctor vnd jn der benanten kayserlichen stifft kchorherr, Hanns Krafft prediger der stat zu Kcham, Erhart Kchrafft pharer zu Zeydlaren Regenspurger bistumb vnd maister Hanns Tanhawser der benanten stifft schulmaister, zu allen obgeschriben sachen zeugen, ermonet vnd requirirt vnd vleyssig gepeten."||
||
[NOTARIATSSIGNET] "Wann aber jch Hanns Zobel, aus kaiserlicher macht offner notarj, ain geweichter Freisinger bistumb, bey allen obgeschriben sachen, wie die vor dem benantten erwirdigem herren, herren Johannsen dechant, begangen vnd volpracht sind, selbs mit sampt den vorgeschriben zeugen, damit vnd pey personlich gewesen pin, auch solich all handel gesechen vnd gehort hab, darumb ich aus beuelhnus vnd geschafft des vorgenantten erwirdigen herren, herren Johannsen dechant, dicz gegenwuertig jnstrument durch aines anderen hant treulichen geschriben hab gemacht vnd in disew offen form geuestiget vnd geczogen, auch mit seiner wirdichait anhangenden jnsigel, auch meiner gewandlichen zaichen vnd namen bewart vnd bezaichet zu ainer waren vrchunt gelauben vnd zeugnuss aller obgeschriben sachen."

Source Fulltext: Pichler, Isfried H., Urkundenbuch des Stiftes Schlägl, Aigen i. M., 2003, Nr. 454 (S 325), S. 501-502