Ich Thomas und ich Otte die prveder die Waser wir veriehen vnd tvn chvnt allen den, die disen prief lesent oder horent lesen, die nv lebent vnd hernach chvnftich sint, daz wir mit vnser erben gvtem willen vnd gvnst vnser mvter vron Gerdravden vnd vnser prveder Jansen vnd Jorgen vnd vnser swester vron Margreten vnd irz Wirtes hern Chvnrades von Winpaizzingen vnd mit gesamter hant, zv der zeit, do wir iz wol getvn mohten, verchavft haben vnsers rehten aigens ainen weingarten, der da leit ze Grintzingen hinder dem dorf in dem Geren, der da haizzet der Waser, des ain jevch ist, der vns von vnser mvoter vnd von vnsern prvedern vnd von vnser swester mit fvrziht ze rehtem erbtaile angevallen ist. Denselben weingarten haben wir geben vmb zwai min fvmfzig phvnt wienner phenninge, der wir reht vnd redlichen gewert sein, vnd vmb ein halp phunt leichavffes vnser mv^oter vrowen Gertravden, des sie avch gewert ist, dem erbaern manne Levpolden dem fleishacker, pvrger ze Wienne, des Hirtzzen aidem, vnd seiner havsvrowen vron Margreten vnd allen irn erben ledichlichen vnd vreilichen ze haben und allen irn frvmen damit ze schaffen, verchavffen, versetzzen vnd geben, swem sie wellen, an allen irresal. Vnd wand der vorgenannt Levpolt vnd sein havsvrowe vro Margret der aigenschefte des vorgenannten Weingarten niht genoz sint, davon so haben wir, ich Thomas vnd ich Otte sein prvder, die aigenschaft des vorbesprochen weingarten geben lavterlichen dvrh got vnd dvrh vnser vordern sele willen vnd avch dvrh vnser selber sele hail avf daz gotshavs vnser vrowen vnd der Schotten ze Wienne also beschaidenlichen, daz der vorgenant Levpolt vnd sein havsvrowe vro Margret vnd ir erben, oder swer den vorgenannten Weingarten nah in besitzzet, davon dienen svln ewichlichen alle jar dem vorgenanten Gotshavse vnser vrowen vnd der Schotten ze Wienne sechs wienner phenninge ze rehtem purchrehte. Vnd darvber durh pezzer sicherhait so setzzen wir uns, ich Thomas vnd ich Otte vnd ich Jans vnd ich Jorge die prveder die Waser vnd ich Margret ir swester vnd ich Chvnrat von Wintpaizzingen ir gesweie, vnverschaidenlichen dem Gotshavse vnser vrowen vnd der Schotten ze Wienne vber die aigenschaft des vorgenanten weingarten ze rehtem scherme fvr alle ansprache, als aigens reht ist vnd des landes reht ze Osterreiche. Und wand ich Thomas vnd ich Otte vnd ich Jans niht insigel haben, davon so haben wir geben dem Gotshavse vnser vrowen vnd der Schotten ze Wienne diesen prief ze ainem vrchvnde vnd ze ainem gezevge vnd ze ainer vestnunge diser sache versigilten mit vnsers prvder Insigil Jorgen vnd mit vnsers gesweien Insigil hern Chvnrades von Wintpaizzingen, vnd sint avch des gezevg her Greiffe, her Chvnrad der hubmaister, her Vlrich bei den Minnern Prvdern, her Otte, her Chvnrat Pvlle ze den zeiten pvrgermaister ze Wienne, her Hainrich von der Neizze ze den zeiten Lantschreiber in Osterreiche, her Hainrich der Chrannest ze den zeiten rihter ze Wienne, her Wernhart sein prvder, Gotfrid der Solsneider, Mainhart der Pank, Jans von sand Po^elten, Pvrkel der Hevtchavfer vnd ander frvme levte genvch. Dieser prief ist geben ze Wienne, do von Christes gebvrt waren ergangen drevzehen hvndert Jar in dem vierten jare darnah, an sand Gregorientage.

Source Fulltext: HAUSWIRTH, Schotten (=FRA II/18, 1859) S. 114-115