Wir Abbt Vlreich dacz Zwetel vnd wir der ganncz Conuent gemaynn doselbs veriechen offennleich mit dem brief allen den, die inn sechent, lesent oder horent lesen, gegenbürtigen vnd kwmftigen, daz wir mit wolbedachtem muet vnd mit veraintem Rat recht vnd redleich verchauft haben vnser dritaill weynngarten, gelegen ze Leutacher in der Chesswasserpewnt, daz weillent gewessen ist Symons dez Smw¨czen von Erkkenbrechts, daz er vns vnd vnser frownkloster ze Zwetel geschaft vnd gegeben hat zw der zeit, do er daz wol getwen macht, nach lawt vnd sag dez briefs, den wir darvber haben von dem hochgeporn furstleichen herren herren Johannsen von gotes gnaden Burkchgraffen ze Maidburg vnd graffen ze Hardekk, in des gepiett vnd herschaft daz dritaill weyngarten leyt, vnd mit des Erbern herren herren Hannsen, die zeit pharrer ze Hardekk, der des dritaill weyngarten rechter gruntherr ist, dazselb drittail weynngarten hawen wir verchauft mit allen nwczen vnd rechten, vud darczw gehört, dem wolbeschaiden man Niclassen Gerboten von Gerys, Soffeyn seiner hausfrown vnd iren eriben vmb ayndlef phunt vnd sechczig phennig; als wienner mwniz, der wir ganncz vnd gar beczalt sein ze rechten tegen an allen schaden. Von demselben drittaill weynngarten all Jare mann purkchrecht vnd diennt an sand Michelstag zehen phennig ze purkchrecht vnd sechs tayding phenning dem pharrer ze Hardek, wer pharrer doselbs ist, mit soleicher beschaidenhait, daz Sy hinfür allen iren frwm mit dem drittaill weynngarten wol schaffen mugen mit verseczen, verchauffen, vermachen, verschaffen vnd geben, wem sew wellent, an all Irrung vnser vnd vnser nachkomen. Vnd ob daz ze schulden kem, daz sew Chrieg oder ansprach gewunnen mit dem Rechten, von wem daz werr, denselben chrieg vnd ansprach sullen wir inn allen auzrichten vnd ir scheden all abtragen. Gieng inn awer daran icht ab, daz schullen Sy hawen auf vns vnd vnserm Kloster vnd auf allen den gütern, die darczw gehorent. Mit vrchund dicz briefs besigilten mit vnsern paiden anhangunden Insigel, der geben ist nach Christi gepurd vierzehenhundert Jare vnd darnach im vierden, an sand Maria Magdalen tage.

Source Fulltext: HAUSWIRTH, Schotten (=FRA II/18, 1859) S. 487-488