Ich Jacob von Chrut vergich vnd tv^on chvnt allen den, die disen prief sehent oder ho^erent lesen, die nv lebent vnd hernach chvnftich sint, daz ich mit gutem willen vren Katherinn meiner housvrowen durch vnserr baider sel willen vnd vnserr vordern seln ze trost vnd ze hilf geschaft haben dem gotshovs vnd der samnunge vnserr vrowen sand Marein der Schotten ze Wienn sehs pfunt pfenninch gult wienner mvnz ze Laeutweins, die die purger von Prukke, die daz gu^et inne haben, aller iaerichleich dienen schullen, daz man diesaelben gult nach meinem tode dienen schol dem vorgenannten gotshovs vnd der samnunge vnd schol sei aigenleichen angehoren mit aigenschaft vnd mit pu^erchrecht, wenn wier diesaelben aigenschaft in vor langes haben gegeben vnd erledigt von des Svnnberger swester, der got genade, vnd hab daz getan vnd geschaft also beschaidenleichen, daz man mit fvmf pfunden alle iar mainen iartach begen schol ewichleich vnd mit dem sehsten pfunde schol die samnunge bezzern ir pfrvende an demsaelben iag, vnd ist daz, daz ainer meiner naehsten erben bei dem iartag sein wil, dem schol man saelb vierden vnd iren pfaerden von dem gotshaus die chost geben zwaimal, abent vnd morgen. Ovch so schaff ich demselben vorgenanten gotshovs vnd der samnvng ovf ir saelbes aigen vier pfvnt gaelts, die man in ovch nach meinem tode dienen schol von meinen mayrhof in der Lantstrazz, vnd hab daz ovch getan mit sogetaner bescheidenhait, daz man den Charner, des man gedaht hat ovf den freithof dessaelben gotshovses, swenn der zv^ochvmt vnd volbraht wiert, von den vier pfunden besingen schol alle tag ewichleich, vnd die weil, daz er niht zv^ochomen ist, so schol man damit daz gotshovs bezzern, an swev im sein no^et ist. Darnach so schaff ich ovch demsaelben gotshovs vnd der samnung, daz si den Charner desterbaz zv^obringen mvgen, sechzig pfunt pfenning wienner mvnz, die mein vorgenant havsvrowe nach meinem tode, ob sie mich vberlebt, dargeben schol, wenn ich ir meins varnden guts so vil lazze, daz si iz wol getv^en mach vnde schol. Ovch vergich ich des offenleichen, daz ich ditz geschaeft vmb die zehen pfunt gulde, als iz vor benant vnd beschrieben ist, ewichleichen staet haben wil vnd niht verwandeln noch verchern mit niht, ich gewinn erben oder niht, aber daz geschaeft, daz ich getan hab mit den sehzich pfvnden, do behald ich mir vber vollen gewalt, daz ichz verchern mvge, ob iz mier gevellet oder ob ichz ze rat werde, swenn mich got wider gesente. Daz ditz geschaeft gantz vnd staet vnd vnzebrochen beleib, so gib ich darvber diesen brief ze einer v^orchvnde versigelt mit meinem insigel vnd mit meiner gesweyen insigeln, hern Chvnrats des hvebmaisters vnd hern Vlreichs bei den brudern, mit den erbern gezevgen, die hernach geschriben sint, her Greiff vnd sein svn her Greif, vnd her Ott hern Otten svn, der Zolr von Radavn, her Chvnrat der Polle purgermaister ze den zeiten ze Wienne vnd ander frvm laevt gen u^och, den daz geschaeft chunt vnd gewizzen ist. Dieser brief ist gegeben, do nach christes gebu^ort warn ergangen Tovsent iar vnd drivhvndert iar darnach in dem vierden iar, des naehsten tages nach sand Gilgen tag.

Source Fulltext: HAUSWIRTH, Schotten (=FRA II/18, 1859) S. 115-116