Ich Vlrich der Zendel, purger ze Wienne, vnd ich Katreine sein havsvrowe, hern Wilhalmes tohter des Scherandes dem Got gnade, wir veriehen vnd tvn chvnt allen den, die disen prief lesent oder horent lesen, die nv lebent vnd hernach chvnftich sint, daz wir mit vnser erben gvtem willen vnd gvnst, mit verdahtem mvte vnd mit gesamter hant, zv der zeit, do wir iz wol getvn mohten, verchavft haben vnsers rehten purchrehtes ain phvnt wienner phenninge geltes pvrchrehtes, daz da leit in der Walichstrazze ze Wienne avf ainem havse, daz weilen êê derpv^etschinnen was, daz da leit ze nachist oberhalben hern Seifrides havse des Legrer, der zv den Zeiten nahrihter was ze Wienne, vnd daz avch mich Katreinen ze rehtem erbtaile angevallen was von meinem vater dem vorgenanten hern Wilhalme. Dazselbe phvnt geltes pvrchrehtes haben wir geben mit allem dem nvtz vnd reht, als wir iz in pvrchrehtes gewer herpraht haben, vmb fivmf march loetiges Silberz wienner gewihtes, des wir reht vnd redlichen gewert sein, dem erbaern herren hern Helnwigen, der zv den zeiten Chapplan was der Chappellen sand Pangratien, die da leit an des Herzogen Hove ze Wienne, ledichlichen vnd vreilichen ze haben vnd allen sein frvmen damit ze schaffen, verchavffen, versetzzen vnd geben, swem er welle, an allen irresal. Vnd darvber dvrh pezzer sicherhait so setzzen wir vns, ich Vlrich der Zendel vnd ich Katreine sein havsfrowe, vnverschaidenlichen fvr vns vnd fvr alle vnser erben dem vorgenanten hern Helnwigen vber daz vorgesprochen phvnt geltes pvrchrehtes ze rehtem scherme fvr alle ansprache, als pvrchrehtes reht ist vnd des landes reht vnd der stat reht ze Wienne, vnd geben im darvber disen prief ze ainem sihtigen vrchvnde vnd ze ainem offen gezevge vnd ze ainer ewigen vestnvnge diser Sache [119] versigilten mit vnserm Insigil vnd mit maister Perhtoldes Insigil, der zv den Zeiten Lantschreiber was In Osterreiche, vnd mit hem Nychlas Insigil von Ezlarn, der zv den Zeiten Rihter was ze Wienne, di diser sache gezevg sint mit ir lnsigiln, vnd sint avch des gezevg her Rvedger der Schreiber in vern preidenstrazze, Rvedger der altmanninnen svn, Hainrich der Hantvest Schreiber ze Wienne vnd ander frvrne levte genvch. Diser prief ist geben ze Wienne, do von Christes gebvrt waren ergangen Drevzehen Hvndert iar In dem Sechsten Iare darnah, an sand Jorgen tage.

Source Fulltext: HAUSWIRTH, Schotten (=FRA II/18, 1859) S. 118-119