Wier Wilhalm von gots genaden abt vnd die samnung gemain des gotshouses vnser vrowen sant Marein der Schotten ze Wienn veriehen vnd tv^on chvnt allen den, die diesen brief lesent oder ho^erent lesen, die nv lebent vnd hernach chvnftich sint, daz wir von den zehen pfvnden gaeldes, die vns vnd vnserm gotshovs der erber man, her Jacob von Chrut, durch seiner sel vnd seiner vordern sel willen ewichleichen geschaft hat, mit fvmf pfvnden seinen iartach begen schullen alle iar vnd ewichleichen, vnd mit dem sehsten pfvnde schulle wier an demsaelben tag vnzer pfrv^ende bezzern, vnd schullen ovch seiner sel gedenchen fleizchleich mit messen, mit vigilien, mit beten, mit allen gvten werchen, vnd wol ainer seiner naehsten erben bei dem iartag sein, dem schulle wier selb vierden vnd iren pfaerden die chost geben zwaymal, abent vnd morgen. Darnach so schulle wier von den andern vier pfvnden daz schaffen, daz der charner, des man ovf vnserm freithof gedaht hat, swenn er zv^ochvmt vnd volbraht wiert, alle tag besvngen werde ewichleichen, vnd die weil, daz er niht zv^ochomen ist, so schulle wir mit densaelben vier pfvnden vnser gotshovs bezzern, an swiv im sein no^et ist. So schulle wier die sechszic pfvnt pfenning, die er vns ovch geschaft hat, die vns sein hovsvrowe vre Katherey nach seinem tod, ob si in vberlebt, geben schol, an densaelben charner legen vnd mit anheben. Ovch veriech wier des offenleichen, swa daz waer, daz wier niht behielten, als iz vor beschriben vnd benant ist, vnd daz lizzen fraeveleich und niht behalten wolten, so schol diesaelbe gulde vnd daz vorgenant gu^et seinn naehsten erben wider anerben vnd schullen sich die ir vnderwinden, vnd schulle wier dawider chain widerrede haben. Vnd daz ditz dinch staet vnd gantz vnzebrochen beleib, so gebe wier darvber disen brief zv einer v^orchvnde vnd zv einer bestaetigunge dersaelben sache versigelt mit vnsern insigeln, mit den gezevgen, di hernach geschrieben sint, her Greyff vnd sein svn her Greyff, der Zolr von Radavn, her Ott hern Otten svn, her Chvnrat der Huebmaister, her Vlreich bei den bru^odern, her Phylipp in des abts hovs von Agmvnd, Fridreich vnser amman vnd ander frvm laeut genv^och, den die sache wol chvnt vnd gewizzen ist. Dieser brief ist gegeben, do nach Christes gebu^ort warn ergangen tovsent iar vnd driv hundert iar darnach in dem vierden iar, des naehsten tages nach sant Gylgen tag.

Source Fulltext: HAUSWIRTH, Schotten (=FRA II/18, 1859) S. 117-118