Ich Stephan der Levbel vergich vnd tuen chvnt allen den, di disen prief lesent, horent oder sehent, di nu lebent vnd hernach chunftich sint, daz sogetan chriech vnd ansprach, als gewesen ist zwischen mir einhalben vnd dem Erbern herren, apt Nychlasen von den Schotten vnd sinem Goteshause, anderhalben, mit vnser baider guetlichem willen gelazzen wart an den Erbern Ritter, minen herren hern Chunraten den Jungen Huebmaister, vmbe Ein wisen, die bei Hintperch gelegen ist. Der hat ez also beschaiden zwischen vns, daz diselbe wise mein vntz an meinen tot wesen sol vnd danne nach mein aines tode, so sol diselbe wise ledichlichen vnd an allen chriech des vorgenanten herren apt Nychlass vnd sines Goteshauss ewichlichen beleiben. Diselben schidvnge gelob ich stet ze behalten, vnd daz tuen ich mit guetlichem willen vern Immen meiner Havsvrowen vnd aller meiner Geerben. Vnd darvmbe, daz daz alles also gantz staet vnd vnzerbrochen beleibe, des gich dem vorgenanten herren apt Nychlasen vnd sinem Goteshause darvher disen brief ze einer ewigen bestaetigunge versigelten mit meinem Insigel vnd mit meiner baider herren Insigel, hern Chvnrates des huebmaister vnd hern Chvnrates sines Svnes. Diser prief ist gegeben, do von Christes gepurt waren ergangen Dreuzehen hundert Iar vnd darnach in dem zwelften Iare, an sant Thomas awent.

Source Fulltext: HAUSWIRTH, Schotten (=FRA II/18, 1859) S. 141