Wir Nycla, von Gots gnaden Apt von den Schotten ze Wienn, vnd ich Ernst von Toblieh, Perigmaister miner vrowen der Nun von Tuln, veriehen vnd tun chunt allen den, di disen brief sehent oder horent lesen, di nu sint vnd hernach chunftich werdent, Daz der beschaiden man Maister Chvnrat von Lyntz, des Hertzogen Schriber, des di Chappel ist dacz sand Pangreczen auf dem Hof ze Wienn, hat getailt den weingarten an der Hohenwart, des zwei Jeuch sint vnd gehort an die vorgenanten Chappelln ze sand Pangreczen, in Sehs Tail, vnd hat derselben Sehstail ains gegeben vnd lazzen Chvnraten dem zehmaister von Toblich vnd sinen Erben ze rehtem Purchreht vmb fumf Ember weins alle jar auz demselben weingarten ze geben in dem Lesen. Wird da niht inne, so sol der vorgenant Chvnrat denselben dienst chouffen an dem nahsten dabei, neben oder oben. Wird auch da niht, so sol er abdingen vmb pfenning mit dem Herren, als er stat an im vindet, nach des weins wert. Er sol auch dem weingarten tun sinen rehten vnd zitlichen pau. Geschech des niht, so sol der Herre sich zihen zu demselben weingarten. Auch ist derselbe weingart dem vorgenanten Chvnraten vnd sinen Erben lazzen vnd gegeben, daz si ir frum in demselben reht damit schaffen mugen mit verchouffen vnd versetzen mit der Herren hant, als ez in aller pest fugt. Vnd swer dazselb sehstail inne hat, nv vnd furbaz von diser zit, der sol vber den vorgenanten dinst einen Ember dinen des alten Perchrebtes den vorgenanten Chloster vrowen ze Tuln oder swen si darzu schaffent. Disen wandlung ist geschehen mit vnser gvnst vnd mit vnser hant durich reht not vnd ehaft sache ze pezzerung der vorgenanten Chappeln ze sand Pangreczen. Ich Maister Chvnrat der vorgenant vergich, daz ich gewandelt han mit disen dingen in aller der bescheidenheit, als in dem brif geschriben ist. Daz auch daz stet an allen pruch beleibe, daruber ist gegeben diser brief zv einem vrchund besigelt mit vnser drier Insigln. Der prief ist gegeben, do van Christes gepurd warn ergangen Tausent iar drivhundert iar darnach in dem zweliften iar, an sand Andres tag.

Source Fulltext: HAUSWIRTH, Schotten (=FRA II/18, 1859) S. 140-141