Wir Elspeth, von gotes genaden weiln Chuniginne ze Rôm, veriehen offenlich an disem prief vnd tu^en chunt allen den, di in sehent vnd lesen ho^erent, daz wir von der beweisung vnd von dem rat vnsers Gaistlichen vaters Byscholf Wernhartes von Pazzawe, mit wolverdahtem mu^et ze Selgerêt aller vnsern vordern vnd sunderlich vnsers lieben herren vnd wiertes Chunich Albrehtes von Rôm vnd auch vnser selber Sele vnd vnser nachchomen vnd sunderlichen zv einer widerlegunge der veiertag, die an vnserm Sieden ze Halstat, daz wir mit vnserm gu^et vom wildem gepirig enbawen haben, vbergangen vnd zebrochen werdent mit arbait, der man doch ze no^et niht enberen mach, vnser Almu^esen von dem vorgenanten Sieden den Gaistlichen leuten . . . dem apte vnd dem Conuent des Gotshauses vnser frowen sand Marien der Schotten ze Wienne mitgetailet vnd gegeben haben, also daz in vnser phleger oder amptleut ze Halstat alle Iar an sand Georigen tag Dreizzich fu^eder du^erres Saltzes geben sullen, vnd dazselbe Saltz sol in an allen vnsern Mautten, ze Gmunden vnd ze Stain, ledichlich an Mautte fu^ergên. Wer awer, daz in vnser phleger oder amptleut daz vorgenant Saltz an dem vorgenanten tag niht geben, so gebiet wi^er vestichlich bei vnsern hulden vnsern purchleuten ze Halstat, daz si dehain Saltz ze Halstat auzfu^eren lazzen, vntz daz daz vorgenant Saltz dem vorgenanten Gotshaus verichtet werde. Ez sol auch der vorgenant apt vnd sein Conuent vnser dienerinne Alhaiten, Nyclôs von Newenburch witten weilen vnsers Chuchenmaisters, von dem vorgenanten Almu^osen ein teglich herren phru^ont geben von Chuchen vnd von Cheller reht als einem herren, doch also, swaz von Selgereten oder sust von andern sachen besunder pytantzen den herren zv i^er phru^ent vnder stunden gegeben wi^ert, des ist man i^er niht gepunden ze geben, sust ein teglich herren phru^ent sol man ir geben vntz an iren to^ed, vnd danne nach i^erem to^ed, so sol der vorgenant apt oder swer ze den Zeiten apt ist alle Jar an sand Phylippes tag seinen Conuent ein halbes phvnt wienner phenning ze pezzerung i^err phru^ent geben von dem vorgenanten Saltz, daz si darvmbe desselben tages, vnsers vorgenanten Wi^ertes, der an demselben tag verschied, vnd vnser vordern vnd nachchomen vnd auch den vnsern, swenne wir niht ensein, Jartag begen mit vigilien vnd mit Sel messen vnd mit andern gotlichen sachen, vnd wellen, daz si die vorgenanten setze vmb die phru^ent vnd vmb den Jartag stet vnd vnzebrochen behalten, also ob in daz vorgenant almvsen alle Jar wirt gegeben vnd ewichlich behalten. Swo awer des in niht behalten wirt, so sind si vns weder vmb die phrunt noch vmb den Jahrtag niht gebunden. Vnd darvber geben wir in disen prief zu einem ewigen vrchunt besigelten mit vnserm Insigel. Der ist geben ze Wienne, do man zalt von Christes geburd dreutzehen hundert jar vnd darnach in dem drevtzehenten Jar, an sand Michels tag.

Source Fulltext: HAUSWIRTH, Schotten (=FRA II/18, 1859) S. 142-143