Ich Hainreich von Hauspach vnd ich Geisel sein hausvrowe vnd ich Vlreich vnd Gvndacher ir svne wir veriehen vnd tvn chvnt allen den, die disen prief lesent oder horent lesen, di nv lebent vnd hernach chvnftich sint, daz wir mit vnser erben gutem willen vnd gvnst, mit verdachtem mvte vnd mit gesampter hant, zu der zeit, do wir iz wol getvn mochten, verchauft haben vnsers rechten aigens ain lehen, daz da leit ze Paetzenthal mit alle dev vnd darzv gehorent, ze holtze, ze velde, ze dorfe, iz sei gestift oder ungestift, versucht oder vnversucht, swie so daz genant sei, vnd da man von dient alle Jar an sand Michelstage ain halp phvnt wienner phenninge geltes vnd ainen halben mvt chorn geltes, daz vorgenante gut allez haben wir reht vnd redlichen verchauft mit allem dem nvtz vnd reht, als wir iz in aigens gewer herpracht haben, vmb fvnfzehen phunt wienner phenninge, der wir reht vnd redlichen gewert sein, dem Goteshause ze sand affern datz Eckendorf in dem langen tal furbaz ledichleichen vnd vreileichen ze haben vnd ewichlichen dapei ze bleiben an allen irresal. Vnd darvber durch pezzer sicherhait so setzen wir vns, ich Hainreich von Hauspach vnd ich Geisel sein hausvrowe vnd ich Vlreich vnd ich Gvndacher ir svne, für vns vnd fur alle vnser erben vber daz vorgenante gut allez dem Goteshavse ze sand affern dacz Echendorf vnd den erbern levten Philippen den Grunpechen vnd Vlrichen dem Michelsteter vnd den andern erbern levten, die dazselbe guet gechauft vnd vergulten habent, ze rechtem scherm für alle ansprache, als aigens recht ist vnd des landes recht ze Osterreiche. Darvber wellent die erbern levte, die daz vorgenant gut gechauft habent, daz der vorgenanten gulte man dienen sol alle Jar dem vorgenanten Goteshause ze sand affern dacz Eckendorf sechs schillinge ze ainem ewigen liehte vnd swer pharrer daselbens ist, Sechzich phenninge ze Selgeraete, der des vorgenanten lehens stifter vnd storer sol sein, vnd ewichleichen gedenchen ains Ruegern des Hippleinstorfer vnd ainer Margreten seiner hausvrowen vnd ains Vlreiches vom Chadolz vnd seiner hausvrowen vnd Chunrades des Chiner vnd seiner hausvrowen, durch der seien willen man die vorgenanten gulte gechauft hat vnd geben dem Goteshause. Vnd geben in darvber disen prief ze ainem sichtigen vrchunde vnd ze ainem offen gezevge vnd ze ainer ewigen vestenvnge diser sache versigilten mit vnsern Insigiln, vnd sint auch des gezevg her Pilgreim von Puechhaim, her Wernhart vnd her Ernst die prvder von Sweinwart, Hainreich vnd Vlreich die prvder von Intzestorf, Philip der Grvnpeche, Rudolf der Seznagel vnd Jacob vnd Stephan die pru^edere vnd ander frvme levte genvch, den dise sache wol chvnt ist. Diser prief ist geben ze Wienne, do von Christes geburt waren ergangen drevzehen hvndert Jar in dem vierzehenten Jare darnach, an sand Merteins tage.

Source Fulltext: HAUSWIRTH, Schotten (=FRA II/18, 1859) S. 146-148