Wir Nichla, von Gotes gnaden apt des Gotshavses vnser vrowen zv den Schotten ze Wienne, veriehen vnd tvn chvnt allen levten, die disen prief sehent oder horent lesen, Daz der erbaer man maister Chvnrat von Lintz vnser Chapplan zv sand Pangraetzzen ze Wienne an des herzogen hof chom fvr vnser gerihte vnd chlagt hintz einer hofstat, die gehort an dieselben Chappelle zv sand Pangraetzzen vnd dient darzv Grvntrehte fivnfzehen schillinge phenninge alle iar, die was do Alhaiten der Herzoginne mit zvnamen genant, vnd ist gelegen ins Chraftes hof in der walihstrazze ze Wienne, vmb vier phvnt an sechzich phenninge versezzens Grvntrehtes, als lange, vntz daz er avf derselben hofstat behapt, Drev zwispil vber den rehten Cins. Do pat der vorgenant maister Chvnrat darvmb fragen, wie er mit der vorgenanten hofstat varen sol, wand si niht tevraer waer, denne die drev zwispil. Do wart vmbgefragt vnd wart ertailt, man solt im zwen man daravf geben, die die hofstat schatzten. Do wurden im gegeben her Marchart vnd her Seifrid die vorsprechen, die schatzten die hofstat, daz si niht tevraer waer, denne die drev zwispil, die der vorgenant maister Chvnrat daravf behapt hiet, die wurden geraitet an fiunfzehen phvnt phenninge vnd an mer, vnd sagten daz di zwen man pei irn triwen vor vnserm gerihte, daz die vorgenant hofstat niht tevraer waer, denne die drev zwispil, die der vorgenant maister Chvnrat daravf behapt hiet. Do pat derselbe maister Chunrat darvmb fragen, wie er nv damit varen solt. Do wart vmbgefragt vnd ertailt, er solt die vorgenant hofstat versetzzen, verchavffen vnd geben, swem er wolt, vmb den versezzen Cins vnd vmb die Drev zwispil, die daravf gangen waren. Do wart dieselbe hofstat geantwurtet mit des gerihtes hant dem vorgenanten maister Chvnraden zu verchavffen, versetzzen vnd ze geben, swem er welle. Nu hat der vorgenant maister Chvnrat die oftgenanten hofstat mit vnser gvnst vnd mit vnser hant geben Chvnraden Mvntzlein dem Pechen vnd Alhaiten seiner havsvrowen vnd irn erben vmb achzehen schilling phenninge pvrchrehtes alle iar davon ze dienen hintz sand Pangraetzzen dem Chapplan, der zv den zeiten die Chappellen hat, zu disen taegen, zu weihnahten sechs schillinge, zv sand Jorgentage sechs schillinge vnd an sand Michelstage sechs schillinge, vnd svln darvber pachen in daz havs zv sand Pangraetzzen prot, swaz man des bedarf, vntz avf Drei mvtte an lon vnd an allen schaden vnd mue des Chapplans sand Pangraetzzen. Taeten man im da niht rehte mit, so sol er pachen, swo iz im allerpeste fveget, vnd sol der vorgenant peche oder swer di vorgesprochen hofstat hat, des pachens lonen. Geschaeh aber daz, daz der peche oder sein nahchomen avf der vorgenanten hofstat weder pachen noch lonen wolden oder enmochten, so svln si fvr daz pachen dienen sechs schillinge phenninge, also wirt des pvrchrehtes drev phvnt vberal, vnd sol man dev dienen zv den vorgesprochen taegen, an islichem tage ein phvnt. Avh svln die vorgenanten Chvnrat Mvntzel vnd sein havsvrowe Alhait mit derselben hofstat vnd havs irn frvmen schaffen mit versetzzen, mit verchavffen vnd mit geben, swem si wellen, an allen irresal in dem rehte, als si si habent vnd an disem prieve verschriben ist. Dise sache, wand si reht vnd redlich gewandelt ist, haben wir staet vnd geben darvber zv ainem offen vrchvnde dise hantveste versigelt mit vnserm hangvndem insigil. Der prief ist gegeben ze Wienne nah Christes gebvrt drevzehen hvndert iar in dem Sibenzehenten iar darnah, an sand Gregorien tage.

Source Fulltext: HAUSWIRTH, Schotten (=FRA II/18, 1859) S. 157-159