Johannes episcopus seruus seruorum dei dilectis filiis . . abbati et conuentui monasterii sancte Marie Scotorum in Wienna ordinis sancti Benedicti Patauiensis diocesis salutem et apostolicam benedictionem. Cum a nobis petitur, quod iustum est et honestum, tam uigor equitatis quam ordo exigit rationis, ut id per sollicitudinem officii nostri ad debitum perducatur effectum. Sane petitio uestra nobis exhibita continebat, quod clare memorie Rodolfus rex Romanorum, de propria salute cogitans et cupiens terrena pro celestibus salubri commercio commutare, ius patronatus parrochialis ecclesie in Gaunestorf Patauiensis diocesis tunc ad ipsum racione ducatus sui Austrie, in quo dicta ecclesia consistit, pertinens pro sue ac progenitorum suorum animarum remedio uobis et monasterio uestro in puram et perpetuam elemosinam pia et prouida liberalitate donauit, venerabilis fratris nostri . . episcopi Patauiensis ad id accedente consensu, prout in patentibus litteris inde confectis, episcopi et regis predictorum sigillis munitis, plenius dicitur contineri. Nos itaque uestris supplicationibus inclinati, quod super hoc pie ac prouide factum est, ratum et gratum habentes id auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Auinione V^o. kalendas Februarii, pontificatus nostri anno primo.

Source Fulltext: HAUSWIRTH, Schotten (=FRA II/18, 1859) S. 156-157