Ich Jans vnd ich Alber vnd ich Dietreich vnd ich Christan, hern Dietreichs sune dez Huotstoches, dem got genade, vnd ich Vedelhilt, vnde ich Erntraut, ir swester, wir veriehen vnd tuon chunt allen den, die disen brief lesent oder horent lesen, die nu lebent vnd hernach chunftich sind, Daz wir mit vnser erben guten willen vnd gunst vnd mit verdachten muot zv der zeit, do wir iz wol getuon mochten, verchauft haben vnsers rechten aigens acht phunt wienner phenninge geltes vnd syben vnd fu^emftzich phenninge geltes, die da ligent ze Gevnestorf' hie derhalbe der Prukke wiendhalben auf Gestiftem gu^ot, vnd fu^emf vnd viertzich metzen Haber gulte mit dem Chornmetzen daselbens. Die vorgenanten Gulte haben wir recht vnd redleich verchauft mit allem dem nutz vnd recht, alz wir si in aigens gewer herpracht haben, vmb Sechs vnd Sybentzich march silbers, ie zwen vnd sibentzich grozzer pehemischer phenninge für ein iegleich march, der wir recht vnd redleich gewert sein, dem erbern herren Apt Mauritzen datz den Schotten ze Wienne vnd dem Couent gemain dezselben Chlosters vnd allen irn nachchomen furbaz ledichleich vnd vreileichen ze haben vnd allen irn frumen damit ze schaffen, verchauffen, versetzen vnd geben, swem si wellen, an allen irresal, vnd habent auch si vns mit dem vorgenanten silber geledigt hintz Juden vnd hintz Christen, swa iz vnser vater vnd vnser mu^oter vnd auch wir hin gelten solden. Vnd wand vnser bru^eder Dietreich vnd Christan noch zv ir iarn nicht chomen sind, vnd auch vnser swester vro V^edelhilt vnd vro Erntraut noch nicht vogtper worden sind, davon so setzen wir vns, ich Jans vnd ich Alber, dez vorgenanten hern Dietreichs Sune dez Hu^otstoches, vnd ich Meinhart von Vellabrvnne vnd ich V^olreich, sein bru^eder, vnd alle vnser erben fur vns vnd fur sev vber die vorgesprochen Gulte alle dem erbern Herren Apt Mauritzen datz den Schotten ze Wienne vnd dem Couent gemain dezselben Chlosters vnd allen irn nachchomen zv rechtem gewer vnd Scherm für alle ansprach als aigens recht ist vnd dez Landes recht ze O^esterreich. Waer aber, daz si mit recht an der vorgenanten gulte dehainen Schaden naemen, denselben Schaden suln si haben vnuerschaidenlich auf vns vnd auf allem vnserm gut, daz wir haben in dem Lande ze O^esterreich. Vnd geben in darvber disen brief zv einem offen vrchunde vnd zv einem warn gezeuge diser sach versigilten mit vnsern Insigiln vnd mit dez Edeln herren Insigil Graf Chunrades von Schawenberch vnd mit hern V^olreichs Insigil von Pilichdorf vnd mit hern Otten Insigil von Cheyaw^e vnd mit hern Marchartes Insigil von Mistelbach, die diser Sach gezeuge sind mit irn Insigiln, vnd ander erber Herren genu^och, den disev sach wol chunt ist. Diser brief ist geben ze Wienne, do von Christes gebu^ert warn ergangen Dreuzehen Hundert iar in dem Acht vnd zwaintzgisten iar darnach, an vnser vrowen tage zv der Chundunge.

Source Fulltext: HAUSWIRTH, Schotten (=FRA II/18, 1859) S. 179-180