Nos Mauritius dei gracia abbas totusque conuentus ecclesie sancte Marie Scotorum in Wyenna tenore presentium recognoscimus, publice profitentes, nos ad pie recordationis quondam illustris domini nostri ducis Hainrici Austrie et Styrie (sic) quadraginta marcas argenti Wiennensis ponderis et numeri ad salutem et remedium anime sue ac omnium progenitorum et successorum suorum plenarie percepisse easque in usum et profectum nostri monasterii necessarium totaliter conuertisse, sed, quia beneficium datur propter officium et per suffragia deuotorum continua, queque fidelis anima sperat suorum consequi ueniam delictorum nec non consorcio perfrui beatorum, idcirco deuocionem piissimam, quam in huiusmodi elemosine benigna largicione nobis propter deum nostreque inopie releuamen ostensam et exhibitam deuota vicissitudine refundere cupientes, nos ac nostri in posterum successores promittimus, quod annis singulis anniuersarium ipsius ac progenitorum et successorum suorum cum solempni officio defunctorum et uigiliis longioribus in die S. Blasii peragere tenebimur, ad quos exequendum solempniter nos insimul uolumus obligari, adiicientes quodque de nostris redditibus uidelicet octo libras denariorum Wyennensium usualis monete, que nobis seruiuntur ante portam Scotorum auf der Peunt, quas ad hec pro iam dicta pecunia nobis tradita concordi animo communique consilio deputamus, ut in die eiusdem anniuersarii toto nostro conuentu cunctisque prebendariis ecclesie nostre predicte adherentibus de redditibus prefatis duo bona fercula carnium una cum consueta prebenda et maior prebenda boni uini, similiter et unicuique sepe dicti nostri conuentus monacho et professo unum grossum denarium pragensem sine quouis impedimenti obstaculo communiter ministrentur. Si uero, quod absit, nos aut nostri successores ausu temerario vel quacunque negligencia memoratum anniuersarium peragere et pitancias statuto die, ut premittitur, erogare neglexerimus, tunc dominus dux Austrie, qui pro tempore fuerit uel ipsius uices gerentes, de prefato seruicio, uidelicet octo libris reddituum ante portam Scotorum, se penitus intromittant, ipsos alias in remedium distribuentes, prout ipsorum placuerit uoluntati. Ut autem supra scripta omnia et singula perpetuo firma permaneant et inconuulsa, presentes litteras conscribi fecimus, nostrorum sigillorum munimine roborantes. Datum et actum anno domini milesimo trecentesimo tricesimo, in die decollacionis beati Joannis Baptiste.

Source Fulltext: HAUSWIRTH, Schotten (=FRA II/18, 1859) S. 191-192