Ich Diepolt der Sirueyer vnd ich Agnes sein hausurow Wir vergehen vnd tu^on chu^ont allen den, die disen brief lesent oder ho^erent lesen, die nu^e lebent vnd hernach chu^enftich sint, Daz wir mit vnser Erben gu^oten willen vnd gunst, mit verdachtem mu^et vnd mit gesampter hant zv^e der zeit, do wir ez wol getu^en mochten, vnd mit vnsers Lehenherren hant dez hochgeporn fu^ersten hertzog Albrechts ze O^esterreich, ze Steyr vnd ze Chaernden verchauft haben vnsers rehten Lehens, daz wir von Im ze Lehen gehabt haben, Sechs phunt vnd vier vnd Zwaintzich phenninge wienner mu^enzz geltes, mit weisat, mit alle, gelegen ze Staemestorf auf bestiftem gu^et behauster holden, vnd auf alle dew, vnd darzv^e geho^eret, ze velde vnd ze dorf, ez sey gestift oder vngestift, versu^ocht oder vnuersu^ocht, swie so daz genant ist. Dieselben Gu^elt alle haben wir recht vnd redleich verchauft vnd geben mit alle den nu^etzen vnd rechten, alz wir si in Lehens gewer herpracht haben, vmb Siben vnd fu^emftzich phu^ent wienner phenninge, der wir gar vnd gaentzleich gewert sein, Chunraten, zve den zeiten Chamrer dez vorgenanten hochgeporn fu^ersten hertzog Albrechts, vnd seinen Erben, fu^erbas ledichleichen vnd vreyleichen ze haben vnd allen irn frumen damit ze schaffen, verchauffen, versetzen vnd geben, swem si wellent, an allen irrsal. Vnd sein auch wir, ich Diepolt der Sirueyer vnd ich Agnes sein hausurow vnd vnser Erben, vnuerschaidenleich der vorgenanten Gu^elt des egenanten Chunrats vnd seiner Erben recht gewern vnd scherm fu^er alle ansprach, alz Lehens recht ist vnd dez Landes recht ze O^esterreich. Waer aber, das si fu^erbaz mit recht an derselben Gu^elt icht chrieges oder ansprach gewu^ennen, swaz si dez schaden nement, daz su^eln wir In alles ausrichten vnd widerchern an allen irn schaden, vnd su^eln auch si daz haben auf vns vnd auf allen vnserm gu^et, daz wir haben in dem Lande ze O^esterreich, wir sein lebentich oder tode. Vnd daz diser Chauf fu^erbas also staet vnd vnczerbrochen beleibe, darv^eber so geben wir in disen brief zv^e einem warn vrchu^ende diser sach versigilt mit vnserm Insigil vnd mit hern Fridreichs Insigil von Tyrnach, zv^e den zeiten Purgermaister ze Wienn vnd mit meins O^eheims Insigil Christoffen dez Sirueyer vnd mit meins swagers Insigil Perchtolts dez Schu^etzenmaister, die diser sach gezeuge s int mit irn Insigiln. Diser brief ist geben ze Wienne nach Christes gepurt dreutzehen hundert iar darnach in dem zway vnd fu^emftzgisten iar, dez naehsten Mittichens vor Mittervasten.

Source Fulltext: HAUSWIRTH, Schotten (=FRA II/18, 1859) S. 275-276