Ich Swester Alhait von Newnburg, zu den zeiten Priorinn in sand Larenczen chloster ze Wienne, vnd der Conuent gemain daselbs wir vergehn vnd tun chunt allen den, die disen brief lesent oder horent lesen, die nu lebent vnd hernach kunftig sind, daz wir mit wolbedachtem mut vnd mit gemainen Rat nach vnsers Ordens vrlaub zu der zeit, do wir es wol getun mochten, vnd mit vnsers Gruntherren hant des erbern mans herren Benedicten, zu der czeit Ambtman der Schotten gut ze Wienne, recht vnd redlichen verchaufft haben vnser haws, das weilent Mathes des Munzzer gewesen ist, vnd das do leit bey der Himelporten auf der Hulben ze Wienn zenechst dem haws, das weilent Andres des Vrbetschen gewesen ist, dauon man alle Jar dint dem Abtt dacz den Schotten ze Wienn vier Wienner phenning ze gruntrecht vnd den geistleichen frawen in sand Jacobs chloster ze Wienn ein phunt phenning ze purkchrecht vnd nicht mer, vnd das auch wir vmb das phunt gelts purkchrechts, das wir darauf gehabt haben vnd das vns darauf versessen ist, in der purger Schranne ze Wienn mit frag vnd mit vrtail in vnser gewalt erlangt vnd behabt haben vor rechtem gericht, als der gerichtbrief sagt, den wir daruber haben. Dasselb haws haben wir verkaufft vnd geben dem erbern herrn hern Hainreichen, zu den zeiten chorherr in sand Stephans pharr ze Wienn, oder wem er das schafft oder geit, vmb das egenant vnser phunt gelts purkchrechts, das wir darauf gehabt haben, als vorgeschriben stet, so beschaidenleich, das er vnd all sein nachkomen das vorgeschriben phunt gelts purkchrechts furbas alle Jar dauon dienen vnd raichen suln ze drin tegen, an sand Michelstag, ze weichnachten vnd an sand Jorgentag, ye zu den tag achczig phenning, mit allem dem nucz vnd rechten, als man ander purkchrecht dient in der Stat ze Wienn, vnd suln auch mit dem ersten dinst anheben von sand Michelstag, der nun schirist kumbt, vber vir Jar. Es ist auch dasselb phunt gelts purkchrecht abzelosen, wenne er oder sein nachkomen das tun wellen oder mugen, mit Newn pfunden Wienner phenning vnd den dinst damit, der dann zenegst geuallen sol, vber das sol auch der obgenant her Hainreich, oder wem er das egenant haws schafft oder geit, dasselb haws mit den vorgeschriben rechten furbas ledigkleichen vnd freylichen haben vnd allen irn frumen damit ze schaffen, verkauffen, verseczen vnd geben, wem Si wellen, an allen irsail. Wir sein auch vnuerschaidenlichen desselben haws ir Recht gewern vnd scherm für alle ansprach nach der Stat Recht ze Wienne. Get in furbas daran icht ab mit recht oder ob in mit recht dhain krieg darauf entstunde, von wem das wer, das sullen wir in alles ausrichten vnd widerchern an allen krieg, vnd sullen Sy das haben auf allem dem gut, das zu dem vorgenanten vnserm chloster gehort. Das diser kauf furbas also stet vnd vnzebrochen beleib, daruber geben wir in disen brief ze einem offen vrchunde versigelt mit vnsern Insigiln vnd mit des vorgenanten erbern manns Insigil hern Benedicten, zu den zeiten Ambtman der Schotten gut ze Wienne, der diser sach gezeug ist mit seinem Insigil. Der brief ist geben ze Wienne nach Christi gepurd drewczehen hundert Jar darnach in dem drey vnd fumfczigisten Jar, an unsers herren leichnam abent.

Source Fulltext: HAUSWIRTH, Schotten (=FRA II/18, 1859) S. 281-282