Ich Seybot von Mizzingendorff vnd ich Anna sein hausurowe Wir vergehen vnd Tun chunt allen den, die disen brief lesent oder ho^erent lesen, die nu lebent vnd hernach chunftich sint, Daz wir mit vnser erben gutem willen vnd gunst, mit verdachtem mut vnd mit gesampter hant, zu der zeit, do wir es wol getu^en mochten, verchauft haben Recht vnd redleich Newn Schilling vnd zehen phenning Wienner mu^enzze geltes, gelegen ze Gaunestorf auf vberlent, mit alle dem nutz vnd rechten, als wir dieselben Gu^elt in Lehens gewer herpracht haben, vmb Neunthalb phunt Wienner phenning, der wir gar vnd gaentzleichen gewert sein, dem erbirdigen gaestleichen herren Apt Clemens des Gotshaus vnser vrown vnd der Schotten ze Wienne vnd dem Conuent gemain desselben Gotshaus vnd allen irn nachomen, fu^erbaz ledichleich vnd vreileich ze haben vnd allen im frumen damit ze schaffen, verchauffen, versetzen vnd geben, swem si wellen, an allen irresal. Vnd sein auch wir, ich Seybot von Mizzingendorf vnd ich Anna sein hausurow vnd vnser erben, vnuerschaidenleich der vorgenanten Newn Schilling vnd zehen phenning Wienner mu^enzze geltes der egenanten erbern gaestleichen herren gemain daz den Schotten ze Wienne vnd irr nachchomen Recht gewern vnd Scherm für alle ansprach, als Lehens recht ist vnd des Landes recht ze O^esterreich. Vnd swenne auch daz ist, daz wir ervarn, swer der vorgenanten Gult Lehenherre ist, mit desselben hant suln wir oder vnser erben in denne dieselben Gu^elt ausrichten vnd aufgeben an alle widerrede. Tu^en wir des nicht, oder ob in mit recht an derselben Gu^elt icht abgieng, so suln si denn dieselben Newn Schilling vnd zehen phenning geltes haben auf vnserm Perchrecht, daz wir haben ze Grintzingen an dem Schenchenperg, vnd daz vnser rechtes aygen ist, also daz wir vnd alle die, die dazselbe Perchrecht nach vns inne habent, den vorgenanten erbern gaestleichen herren datz den Schotten vnd im nachchomen denne fu^erbaz ewichleich alle iar davon raihen vnd geben suln Newn Schilling vnd zehen phenning Wienner mu^enzze mit einander an sant Michels Tage. Waer aber, daz in denne derselben Newn schilling vnd zehen phenningen geltes an den egenanten vnserm Perchrechte icht abgieng, daz suln si haben auf vns und auf vnsern erben vnuerschaidenleich vnd auf allem vnserm Gu^et, daz wir haben in dem Lande ze O^esterreich, oder swo wir es haben, wir sein Lebentich oder tode. Vnd daz disew sache fu^erbaz also staet vnd vnzerbrochen beleib, darüber so geben wir, Ich Seybot von Mizzingendorf vnd ich Anna sein hausurowe, in disen brief zu einem warn vrchunde diser sache versigilt mit vnser baiden Insigiln vnd mit hern Chunrats Insigil des Vrbaetschen, der diser sache gezeug ist mit seinem Insigil. Der brief ist geben ze Wienne nach Christes geburt dreutzehen Hundert iar darnach in dem Syben vnd fumftzgisten iar, an sant Pangraetzen Tage.

Source Fulltext: HAUSWIRTH, Schotten (=FRA II/18, 1859) S. 290-291