Ich Lasla Prager, erbmarschalh in Khernten beken fur mich und all mein erbn offnlich mit den brieff, das fur mich komen/ ist der erber Ulrich Spieglperger mit ain offn besigltn erbbrieff lautund umb dy dreytaill auf den hoff zw Spieglperg in/ Swanser pharr gelegen, der nun an mich als gruntherrn komen war und der mich in den selben erbbrieff von neuen/ in der aller pestn form und mass, wie es in den selben brief begriffn war, confirmiern und bestattn solt, das [ich] aus/ phlicht und warn wissen gethan hab in krafft ditz briefs, also das er und sein erben dy bestimbten dreytaill an den/ bemeltn hof, irer zwgehorung furan inhaben, nutzen und niessen sullen und mugen nach allen iren notdurften und mir oder/ mein erben jarlich davon raichn und dien sullen zw unser frawen tag der dinstzeit sechs schilling alter wienner phennig/ und nicht mer; ob sy uns aber den bemeltn dinst und vodrung nit zw rechter weill und zeit bezaltn, so ist mir oder mein/ erben das beruert ir erbrecht auf den bemeltn drey tailln des hoffs gantz lediglich frey haym gefallen, ich oder mein erbn/ sullen und mugen auch als dan damit handln und thuen, wie uns verlust an des benanten Ulreichn Spieglperger und aller/ seiner erbn und manigklichs von irn wegen irrung und widersprechn; sy sullen dy dreytaill des benantn hoffs an/ alln endn stifftlich und pewlich haltn, damit wir unsers dinst und vodrung jarlich davon bekomen mugn, auch/ uns damit als ander behaust holden in albeg trew und gehorsam sein, und wan sy dy gemelt ir gerechtigkait der/ drey taill des bemeltn hofs ainen andern versetzn, verkauffn, gebn oder machen wellen, das sol albeg mit unsern/ willn bescheen, und lewtn, dy mir oder mein erben dar zw gefalln. Ich vorbenanter Lasla Prager und all mein erbn/ sullen und wellen auch darumb ir recht gewer und furstant sein fur all rechtlich ansprach, wo und als offt/ in des rechtlich not beschiecht, als dan solhs erbrechts in lannde Osterreich ob der Ens gewonhait und recht ist/ trewlich ongefar; [die] urkunt dits briefs besiglt mit mein aign anhangundn insigl; darunder ich mich und all/ mein erbn verpindn, inhalt dits briefs war und stat zehaldn. Geben montags nach letare in der vastnn/ [do man zalt nach cristi gepurd vierczehenhundert und in vierundnewnczigisten jaren].