Ich Chu^enrat der Puschinger von Zaizzing¹ und Offney mein hausfraw und all unser erben wi^er vergehen offenli^ech an dem prieff und tun kund allen den, dew in sehent ho^erent oder lesent, die nu lebent und hernach chunftig sind, daz wi^er mit wolbedachtem muet nach rat und mit gunst unser na^echsten und pesten frewnt zu der zeit, do wi^er es mit recht wol getu^en mo^echten, recht und redli^ech verchauft und ze chauffen haben gegeben unserm lieben swager U^elrichen von La^enterstorff, di^e zeit phleger zu Wolfstain und lantrichter auf dem Tullnerfeld, und allen seinen erben unsern hof, der gelegen ist in Geroltinger² pharr pey Gaenczpach³ und haizt datz den Mairhofen,⁴ mit den holden, di darczu^e geho^erent, und mit alle dew und darczu^e geho^ert, es sein a^ekcher paunga^erten wismad holcz waid stok stain, swi^e so daz genant ist oder wo daz gelegen ist ze veld und ze dorf, versu^echt und unversu^echt, es sei bestift und unbestift, umb zwai und sibenczk phunt Wienner phenning, der wi^er gancz und gar verricbt und gewert sein. Wi^er haben in auch den egenanten hof mit aller zu^egeho^erung ledichli^ech und unverchumert mit allen nuczen ern und rechten, als wi^er in unversprochenli^ech herpracht und gehabt haben, aufgegeben mit lehenherren hant unsers gna^edigen herren, hern Hansen von Meŷssaw,⁵ obrister schenkch in Osterr(eich), der sein rechter lehenherr ist, also beschaidenl(eich), daz seu in furbaz ledichl(eich) und freyli^ech innehaben sullen und allen iren frum damit schaffen mit verchauffen und mit verseczen machen schaffen und geben, wem si wellen, wi^e in daz allerpest wol cho^em und fueg, an allen chrieg und irresal. Wi^er sein auch des vorgenanten hofs mit aller zu^egeho^erung i^er recht gewern und scherm fu^er all ansprach, als lehens scherm recht ist in dem land ze O^esterri^ech. Wer aber, das sie furbas mit recht icht chrieg oder ansprach auf den obgenanten hof und was darczu^e geho^ert, gewunnen, von wem das wer, und was sie des schaden nement, denselben schaden chrieg und ansprach schullen wi^er in allen ausrichten ablegen und widerchern an all widerred an furbot an chlag und alles rechten und schullen si daz haben datz uns unverschaidenl(eich) und auf aller der hab, di^e wi^er haben in dem land ze O^ester(reich) oder swo wi^er icht haben, es sey erbgu^et oder varundgu^et, wir sein lembtig oder to^ed. Das die red also stêt sei und hinfu^er gancz und unczebrochen beleib, daruber so geb wi^er unserm vorgenanten lieben swager U^elreichen von La^enterstorff und allen seinen erben den offen prieff zu einem waren sichtigen urchund und zu einer ewigen vestigung der sach versigilten mit mein obgenanten Chunrats des Puschinger von Zaizzing und mit meins pru^eder Gorgen des Puschinger mit unser paider anhangunden insigeln. Darczu^e hab wi^er gepeten unsern lieben vettern, hern Merten den Puschinger, das er der sach gezeug ist mit seinem anhangundem insigel im an schaden. Der priff ist geben nach Christs gepu^erd drewczehenhundert jar darnach in dem funf und achczigistem jar an unser frawntag zu der liechtmess.

Source Fulltext: FUCHS, Aggsbach (=FRA II/59, 1906) S. 74-75