Ich Fridreich der En, pu^erger ze Newnburchk klosterhalben, und ich Gerdrawt sein hawsfraw und unser erben wir veriehen und tu^en kund offenleich mit dem bri^ef allen den, die den brief lesent oder ho^ernt lesen, die nu^e lebent und hernach kunftig sind, daz wir mit unser erben gutem willen und gunst mit verdachtem muet und mit gesampter hant zu^e der zeit, do wir es wol getu^en mochten, und mit mein Fridreichs selbs hant, wann ich die zeit pergmeister was daselbs ze Newnburg der erbern geistleichen herren von Pawngartenperg mit rechter furczicht verchaufft haben unsern weingarten, des funf rachen si^end und leit an dem Aychweg¹ daselbs ze Newnburg zenêchst Jacobs des En weingarten unsers su^ens und do man von dem egen(anten) unserm weingarten alle jar dient den erbern geistleichen herren von Pawngartenperg anderhalben emmer und acht stauff weins ze perkrecht und und^a drey Wienner pfenning und drew art ze voytrecht ze drein etaiding im jar und als es mit alten rechten herchomen ist, und nicht mer. Den egen(anten) unsern weingarten haben wir mit fu^erczicht recht und redleich verchaufft und gegeben mit allen den nu^eczen und rechten, als wir den unversprochenleich in perkrechts gewer herbracht haben und als der mit altem rechten herchomen ist, umb newnczig pfunt Wienner pfenning, der wir gancz und gar gewert sein ze rechten têgen, den erbern geistleichen herren, bru^eder Hannsen die zeit prior und dem convent gemain ze Achspach unser frawn porten des ordens von Cartus und allen iren nachko^emen fu^erbas ledikleich und freyleich ze haben und allen iren frumen damit schaffen mit verchauffen mit verseczen und geben, swem si wellent, an allen irresal, als es irm goczhaws allerpest fu^eg und ist, wann der egen(anten) phenning hat geben zu^e dem egen(anten) goczhaws Ulreich der Sneider, die zeit meiner frawen von Meissaw schaffer ze Tyernstain, sechczig phunt Wienner pfenning und die u^eberigen dreissig phunt phenning hat geben zu^e dem egen(anten) goczhaws Hans des Zu^ekkerleins su^ens^b von Gars durich payd tail durch got und durich aller irer vorvordern und nachkomen seelen hal willen also mit ausgenomen worten, daz si paid der egen(ant) Ulreich der Sneyder und der egen(ant) Hanns von Gars sullen den egen(anten) weingarten pawen mit irem gut und sullen den innehaben messen und nu^eczen unverchumert uncz an ir paider tod also, daz der egen(ante) Ulreich sol pawen zwen tail des egen(anten) Weingarten und alle jar daraus nemen zwaÿ tail des paws uncz an seinen tod und alspald er abget mit dem to^ed, so ist ze hant die zway tail desselben weingarten mit paw mit alle ledig dem obgen(anten) goczhaws Kartuser orden an allen irresal, und der obgen(ant) Hanns sol pawen den dritten tail des egen(anten) weingarten auch mit seinem gu^et und sol auch den drittail des paws daraus nemen alle jar und sol den innehaben, denselben drittail innehaben niezzen und nu^eczen unverchumert uncz an seinen to^ed und paid tail sullen den egen(anten) weingarten innehaben in gutem mitternpaw angevêr und wenne der egen(ante) Hanns mit dem tod abget, so ist ze hant derselb drittail des egen(anten) weingarten ledikleich des egen(anten) goczhaws ze Achspach Kartuser orden mit paw mit alle, als si den denne vindent. Und durch pezzer sicherhait willen so seczen und verpinden wir uns obgen(ante) ich Fridreich der En und ich Gerdrawt sein hawsfraw und unser erben des egen(anten) weingarten in dem rechten, als vor geschriben stet, dem obgen(anten) goczhaws unser frawn porten ze Achspach des orden von Kartus dem ganczen convent gemain und allen iren nachko^emen ze rechtem gewern und scherm fu^er alle ansprach, als perkrechts recht ist und des lanndes recht ze Osterreich. Wêr aber, daz si fu^erbazz icht chriegs oder ansprach daran gewu^ennen oder ob in mit recht daran icht abgieng, von wem daz wêr mit recht, was sew des schaden nement, daz sullen wir in alles ausrichten und widerkeren an allen iren schaden und mue und was in daran abget, daz sullen si haben auf uns unverschaidenleich und auf allem unserm gu^et, daz wir haben in dem lannde ze Osterreich oder wo wir es haben, es sey eribgu^et oder varund gu^et, wie so daz genant ist, wir sein lebentig oder tod. Und daz der vorgeschriben chauf und scherm furbas also stêt und unzebrochen beleib, darumb so gib ich Fridreich der En mit gesampter hant dem prior und convent ze Achspach Kartuser orden den brief versigelten mit meinem insigel. Darczu^e haben wir gepeten den erbern hern, hern Petrein den Lenhofer, korherr und die zeit obrister chelner des goczhaws unser frawn goczhaws ze Newnburkch klosterhalben, und Albrechten von Pi^erbaum² und Ulreichen den Hengwein, die zeit sluzzler und ainer des rats der stat daselbs ze Newnburg, daz sew der sach gezeugen sind mit iren insigeln an unser und unser eriben stat, wann wir sew alle drey fleizzikl(eich) darumb gepeten haben. Der brief ist geben nach Christi gepu^erd drewczehen hundert jar darnach in dem fu^enfundachczigistem jar acht tag nach dem prehemtag.

Source Fulltext: FUCHS, Aggsbach (=FRA II/59, 1906) S. 71-73