Wir Albrecht von gotes genaden herczog ze O^esterreich, ze Steyr, ze Kêrnden und ze Krain, grave ze Tirol etc. bekennen von der zwayung wegen, die da gewesen sind zwischen den erbern geistleichen unsern lieben andêchtigen . . dem prior und . . dem convent zu Achspach ains tails und unserm getrewn, lieben Hannsen dem Neydperger des andern umb ain vischwayd gelegen under dem Achstain, darumb wi^er denselben Neydperger fu^er uns geladen und nachmaln meniger schu^eb uncz auf heuttigen tag getan haben. Da aber der yeczgenant Neydperger noch nyemant von seinen wegen fu^erkame, ist der vorgenant prior anstat sein selbs und seins convents heut, da wi^er zu gericht sassen, fu^er uns ko^emen und liesz uns ho^ern ainen brief, den in weilent Haydenreich von Meyssaw umb dieselb vischwayd geben hat, und pat darumb gerichts. Habent unser herren und rêt, die daczemal bey uns waren, nach des egenanten prior fu^erlegung und seiner brief begreyffung und auch nach unserr frag erkant zu dem rechten, seid der vorgenant Neydperger fur uns geladen ist und baiden tailn meniger schu^eb mit irem willen und dem leczten uncz auf heuttigen tag zu dem rechten von uns geben sind und aber derselb von Neydperg noch nyemant von seinen wegen ist fu^erko^emen, so hab der vorgenant prior und der convent dieselb vischwayd gênczleich behabt und sullen wi^er schaffen in der nucz und gewer seczen mit urchunt dicz briefs. Geben ze Melkch an sand Elsbethentag anno domini etc. quadringentesimo decimo nono.

Source Fulltext: FUCHS, Aggsbach (=FRA II/59, 1906) S. 225-226