Quoniam per lumen tecta cognoscuntur ideoque ipsa lux creaturarum potissimum iudicatur, Nos igitur Conradus de Praunekk praepositus Ardacensis et Otto dictus Gleuzzer decanus totumque capitulum Ardacense profitemur tam praesentibus quam futuris, ad quos pervenerit praesens scriptum, quod dominus Nicolaus scholasticus et confrater noster et Penzo de Hunoldsried cupientes per illud lumen, quod illuminat omnem hominem, perhenniter illustrari, quoddam feodum, situm in Pairdorff, ecclesiae sanctae Margaritae in Ardaker a Chunrado de Perhartsdorf pro XXVIII talentis jure proprietario comparaverunt conditione tali, ut colonus praedicti feodi, quicunque fuerit, singulis annis in festo sancti Michaelis XII solidos tunc usualium Viennensium denariorum custodi Ardacensi serviat sibi sic distincte, ut ipse custos annuatim cum sex solidis nocturnum lumen ad altare gloriosae virginis Mariae in crypta cum sepo aut oleo studeat procurare, et cum residuis sex solidis similiter de lumine nocturno altari sancti Joannis perpetuo voluerit providere. Nos igitur eorum affectionem prosequentes cum favore, de communi fratrum consilio et consensu saepe dicti feodi colono, quicunque fuerit, libertatem hanc duximus concedendam, ut ipse ab universis vexationibus atque steuris sit penitus supportatus et nulli nisi custodi suum censum et jura institutionum et destitutionum morticinia aut emendas, quando cesserint, praesentet. Praesertim, si aliquis nostrorum successorum, sive procurator eorum aut quispiam canonicorum supradictum colonum aliquibus vexationibus praesumpserit aggravare, ex nunc prout ex tunc praelibati emptores Nicolaus et Pentzo statuerunt, ut praedictum feodum spectet in Paumgartenperge ad utilitatem luminum, donec praepositus sive quicunque alter temerarius fuerit, a praedicta injuria corrigatur, quo ab injuria cessante memoratum feodum redeat ad usum Ardacensis ecclesiae sicut prius. In cujus rei testimonium tam sigillo praepositurae nostrae, quam sigillo capituli nostri praesentes literas roboravimus appendendo. Datum anno domini millesimo tricentesimo tercio decimo in ascensione Domini.

Source Fulltext: FRIESS, Ardagger (AÖG 46, 1871) S. 493-494