Ich Margarete Fridreiches des Gensleins hausvraw vnd Chunrat vnd Dietel mein sune vnd alle mein chint vnd alle ander min erben, wier veriehen an disem gegenburtigen brief vnd tuen chund allen den leuten, di nu lebent vnd auch hernoch chumftich werdent, die disen brief lesent oder horent lesen, daz her Chunrat von Praunek, der ze den Zeiten rechter probest dotz Ardacher was, vnd her Otte der Gleuzzer, der ze den zeiten techant waz der chorherren dotz ardacher, mit gemeinem rat vnd mit gueten willen der chorherren ze ardacher habent uns gegeben ein wiis, dev haiset dev lange wis in der auge zu einem rechten purchreht ewichleieh, also beschaidenleichen, daz wier vund alle vnser erben vnd auch ander leut, swer di vorgenanten wis in nutz vnd gewer het. der sol do von dienen ze purchreht alle iar an vnser vraun tage, der do haizet sand Marien geburt, ein phunt neuer Wienner phennige vnd ob wier oder swer di vorgenanten wis in nutz vnd in gewer het, versitzen oder versaumen, der sol vmbe diselben saumpthait laisten, swaz nach lantes recht vber versaumtes purchreht, wandel vnd puezze in dem lant ze Oesterreich gemain reht ist, vnd wanne wir oder vnser erben oder swer di vorgenanten wis in nutz oder in gewer het, wellen verchaufen die vorgenanten wis, so sullen wier sei von ersten di Chorherrn ze ardacher anvailen offenleichen. do si pei anander sint, vnd sullen dev wis den vorgenanten chorherren nicht teurer anvailen, den ein ander man darumbe gebe. Und daz dev rede stet vnd vnzebrochen ewichleich bleibe paident halben, dar vmbe habe wir disen gegenburtigen brief den chorherren ze Ardacher vnd allen iren nochchomen gegeben zu einem vrchunde vnd zu einem ewigen gezeuge, vnd haben den bestetet vnd geuestet mit her Waltheres des erberen Reiters von Meilenstorf insigel, vnd mit Chunrates insigel, der do purchgraue was ze Säusenek, vnd mit Ruegeres von Zauche insigel, di alle drev sint an disen gegenburtigen brief gehangen, vnd ist daz geschehen ze Ardacher auf dem freithoue zu der zeit, do von Christes geburt waren ergangen tausent jar vnd dreu hundert jar vnd dar nach in dem vierzehentem jar an sand Niclas tag.

Source Fulltext: FRIESS, Ardagger (AÖG 46, 1871) S. 494-495