Hermannus dei et apostolice sedis gracia electus et confirmatus abbas¹ totusque conventus monasterii sancti Galli omnibus presencium inspectoribus salutem cum noticia subscriptorum. Loca pia, que infirmancium et egrotancium || solaciis et necessitatibus intendunt, propensioribus et maioribus debent subsidiis et beneficiis honorari. Hinc est, quod cum vir discretus Hainricus dictus Omme² ministerialis nostri monasterii memorati saluti anime sue cupiens providere, ad nostri venerit presenciam nobisque humiliter || supplicarit, ut curiam sitam iuxta Cappelle³, que Hůb⁴ vnder dem Rodmonten⁵ vulgariter nuncupatur, quam curiam ipse a nobis nostroque monasterio in feodum tenuit et ad manus nostras libere ac voluntarie resignavit, cum pleno iure et directo dominio suorum || pretextu serviciorum ac divine remuneracionis intuitu hospitali pauperum infirmorum oppidi sancti Galli⁶ conferre ac tradere unanimiter dignaremur. Nos itaque iuxta iuris sollempnitatem tractatu prehabito diligenti considerantes et intuentes eiusdem hospitalis beneficia et opera caritatis, que in eo cum desiderio cottidie salubriter perpetrantur, cum in eodem hospitali homines nostri monasterii ad paupertatis incomoda et infirmitatis pericula deducti sub umbrate quietis habitaculo delicacius recreentur, prefati Hainrici iustis et racionabilibus precibus inclinati in memoratum hospitale pure et simpliciter propter deum quo ad verum directum et utile dominium predictam curiam dictam Hůb cum agris, pratis, pascuis, silvis, nemoribus, viis, inviis, aquis aquarumque decursibus et cum omnibus iuribus ac pertinenciis eiusdem curie universis pleno iure concedimus, annectimus et donamus libere et quiete sine inpugnacione qualibet in perpetuum possidendam sub prestacione annui census videlicet unius fertonis cere in festo beati Galli custodi nostri monasterii, qui pro tempore fuerit, annis singulis persolvendi, ita tamen, quod per concessionem huiusmodi monasterium nostrum et ecclesie ac cappelle quecumque serviciis, censibus ac iuribus hostiarum et nummorum eidem curie a prefato Hainrico dicto Ommen antea inpositis nullatenus defraudentur, promittentes bona fide contra hec non venire verbo vel facto et nos ratos et gratos habituros omnia supradicta, renunciantes insuper beneficio restitucionis in integrum ac omni iuris auxilio, per quod premissa possint infringi vel aliqualiter infirmari. In cuius rei verax et evidens testimonium sigilla nostra duximus presentibus appendenda. Ego vero Hainricus prefatus confiteor premissa omnia et singula fore vera, et in eorundem perpetuam firmitatem sigillum meum proprium presentibus est appensum. Datum in sancto Gallo, anno domini millesimo tricentesimo tricesimo sexto, in octava beati Galli confessoris, ind. quinta.

Source Fulltext: Chartularium Sangallense VI, Nr. 3633, S. 239-240.