Allen, die disen gegenwúrtigen brief ansehent alder ho^erent lesen, kúndin wir fro Perpetua dv´ Schenkin von v´ttendorf¹ vnd vro Adelhait hern Willehelmes sa^eligen von Ende² aines || frîen êliche vrowe vnd veriehin dez offenlich an disem brieue, daz wir mit v´nser kinde, d|v hie nach an disem brieue benent sint, willen gunst vnd haissen willeclich vnd mit gůter vorbe||trahtunge vnd nach ir vnd ander v´nser gůter frúnde rat dem erberen beschaiden manne Egelolf dem Blarrer von sant Gallen burger ze Costentz vnd sinen erben habent ze koffent geben || reht vnd redelich den hof ze Helmarswille³ vnd den zehenden ze Helmarswille, die v´ns von erbe angeuallen sint von v´nser můter sa^eligen vnd lehen sint von . . dem abt vnd dem gotzhus ze sant Gallen, vnd swaz zv^o den selben gu^etern ho^ert, ez si mit akern mit wisan mit waide mit holtze mit velde mit wasen mit zwi mit allen nútzen vnd gewonhaiten vnd mit allen rehten, als ez v´nser vordern an v´ns braht hant vnd als wir dv´ selben gu^eter besessen vnd genossen haben her vntz an disen húttigen tag. Disv´ vorgenanten gu^eter mit den rehten, so vorgeschriben stat, haben wir dem selben Egelolf dem Blarrer vnd sinen erben ze koffent geben vmb fúnf vnd sibenzek vnd hvndert pfunde pfenninge gůter vnd gnemer Costenzer múns vnd sigin och der gar vnd ga^entzlich von im gewert vnd sint in v´nsern redelichen nutz komen vnd bewent, als wir veriehin an disem brieue, vnd haben dv´ selben gu^eter vnd swaz darzv^o ho^eret offenlich vor geriht mit vfgend an dez abtes hant, mit fúrsprechen vnd mit vo^egten dem selben Egelolf dem Blarrer gefertegot, als mit vrtailt ertailt wart, vnd haben daz getan vnd vollefu^ert mit allen den worten werken vnd geta^eten, so darzv^o hort ald geho^eren moht nach reht vnd nach gewonhait dez landes, vnd haben v´ns och mit den selben v´nseren vo^egten vnd mit v´nser kinde willen vnd gunst vnd mit ir hant willeclich vnd vmbetwungenlich vor dem vorgenanten v´nserm herren . . dem abt von sant Gallen offenlich vor geriht enzigen, vnd dv´ vorgenanten v´nserv´ kint mit v´ns sich enzigen hant, vnd verzihen v´ns an disem brieue fúr v´ns vnd alle v´nser erben vnd nachkomen gen dem vorgenanten Eglolf dem Blarrer vnd gen allen sinen erben vnd nachkomen ze vrta^et alles des rehtes vnd aller der ansprache, so wir die vorgenanten fro Perpetua dv´ Schenkin von v´ttendorf vnd fro Aldelhait von Ende ir swester ald dv´ selben v´nserv´ kint von v´nseren wegen an den vorgenanten gu^etern vnd swaz darzv^o ho^eret hatten ald von dekainen dingen iemmer gewinnen mo^ehtin von dekainer slaht geriht alder reht gaischelichs ald weltlichs. Wir so^elin och baide gemainlich vnd vnuerschaidenlich vnd v´nser erben der vorgenanten gu^eter siner vnd siner erben reht wem sin nach reht ane geuerde an allen stetten, da ez ime notdúrftig ist. Dar nach veriehin wir Růdolf, Willehelm vnd Etzel gebrůder von Ende⁴ der vorgenanten fro Adelhaiten^a) sún von Ende vnd wir Hainrich vnd V^olrich die Schenken von v´ttendorf⁵ gebrůder der vorgenanten fro Perpetuen sún von v´ttendorf ainer gantzer warhait alles dez, so hie an disem brieue geschriben stat, vnd ist och mit v´nserm gůten willen vnd mit v´nser hant vnd haissen alles zůbraht vnd vollefu^ert luterlich ane alle geuerde. Vnd v´ber daz ze warem vnd offenne vrkúnde vnd sta^eter vnd êwiger sicherhait alles dez, so hie an disem brieue geschriben stat, gebin wir die vorbenenten fro Perpetua dv´ Schenkin von v´ttendorf vnd ir sún die vorgenanten vnd fro Adelhait von Ende vnd die selben ir sún fúr v´ns vnd v´nser erben dem vorgenanten Eglolf dem Blarrer vnd sinen erben dar v´ber disen brief mit v´nseren aigenen insigeln besigelten. Dis beschach vnd ist dirre brief ze Costentz geben, do man von Cristes gebúrt zalte drúzehenhundert jar, dar nach in dem sehs vnd drissigosten jar, an sant Jacobes abende des zwelfbotten.

Source Fulltext: Chartularium Sangallense VI, Nr. 3625, S. 231-232.