Wir Karl von gotes gnaden^a) Ro^emischer chu^enig ze allen zitten merer dez richs vnd chu^enig ze Behem vrchu^enden vnd bechennen vns offenlich an disem brief, wann wir || die stât vnd die burger ze sant Gallen so gnaigig so vnderta^enig vnd auch so gestendig v^ens vnd dem heiligen Ro^emischen rich funden haben, vmb daz haben wir der selben stat || vnd den burgern ze sant Gallen ze fu^erdrung vnd ze gnaden getân, daz wir in nv vnd hernach vestnent, erniurent vnd bestettigen mit disem brief alle ir frihait, ir gůt gwonheit vnd reht || vnd alle ir brief, die sie ha^vnt^b) vnd u^entz vf disen hiûtigen tag her braht ha^unt von chu^enigen vnd cheisern v^ensern uoruarn. Daz bestetten wir allz fu^erbaz ze habent vnd ze hânt alzo, daz wir noch nieman anders von v^ensern wegen chain ir brief, reht, frihait noch gůt gwonhait niht endern noch uerchern su^eln noch wellen in chainen wêg. Wir haben in auch ze gnaden getân nach ir reht vnd frihait, die sie v^entz vf disen hu^etigen tag herbraht ha^unt von chu^enigen vnd keysern v^ensern uoruarn, daz nieman chain ir burger vs irr stat ze chainem geriht ziehen sol vnd daz menclich daz reht von ir burger in irr stat uor ir rihter nemen sol, der cleger werde dann in irr stât rehtloz gelauzzen. Wir haben aûch der selben uorgnanten stât vnd den burgern ze sant Gallen mê ze gnaden getân, daz wir sie durh v^enser not, dz riches nôt noch durh chain ander sach niht versetzzen noch uerka^uffen noch chains wegs uerchu^emmern su^eln, vnd ob daz ienert^c) gen ieman bescheh oder noch beschehen were, daz sol gentzlich ab sin vnd chain craft haben. Wir wollen a^uch, daz die uorgnant stat vnd die burger ze sant Gallen fu^er daz rich enchain pfant sien noch sin so^ellent vnd daz sie auch nieman fu^er v^ens vnd daz rich no^et oder pfende. Darzů haben wir in me ze gnaden getân, daz sie fu^er den fu^ersten ze sant Gallen¹ vnd fu^er daz gotzhus niht pfant sin so^ent vnd daz sie nieman fu^er den fu^ersten ze sant Gallen noch fu^er daz gotzhu^es pfenden noch no^eten sol. Vnd waz vns vnd dem rich uon der selben stat ze sant Gallen v^entz vf disen hiûtigen tag gwonlicher stiuren ergangen sint, der sagen wir sie ledig. Darnach haben wir in aber mê ze besundern gnaden getân, daz sie der stiûr, der sie nû ze dem nehsten sant Martins tag geuallen weren, ledig sin so^ent, vnd darnach aber uon dem selben sant Martins tâg v^eber ain jar der stiûr, der sie danach geuallen weren, aber ledig vnd lôz sin sônt, vnd wer, daz wir ieman vmb die stiûr an sie uerstozzen hetten, daz sol ab sin vnd chain craft ha^un. Wer a^uch, daz der stât vnd den burgern ze sant Gallen die juden, die bi in gwonet ha^vnt², uon ir schirms wegen chain helf getân hetten mit ir dienst oder mit ir gůt v^entz an disen hiûtigen tag, vnd vmb den vflauf, so in der stât ze sant Gallen beschehen ist uon der juden wegen, daz sie da angriffen vnd uerderbet sint, vnd vmb daz gůt, daz die juden ze sant Gallen, die auch da uerderbet sint, nach ir tod hinder in gela^vn haunt, wan sie daz allez gen v^ens vnd dem rich ze hulden gehandlot vnd getedingot ha^unt nach v^enserm willen, darvmb sagen wir sie vmb alle die selben uorbeschaiden sach gentzlich ledig mit disem brief, daz sie daru^eber vnd darvmb v^enser vnd dez riches gnad vnd huld uo^ellclich haunt vnd habent su^ellent. Vnd ha^vnt auch der selben stat vnd den burgern von sant Gallen an disem brief so^elich fu^erdrung vnd gnad getân, ob in iêman der uorgeschriben artichel ir ainen oder me v^eberuarn wo^elt oder wer sie uon den selben gnaden, die wir in an disem brief erzaigt habent, dringen oder zertrennen wo^elte, daz wir der selben stat vnd ouch den burgern von v^enserm chvnglichem gwalt gu^enne vnd erlo^vben, daz sie in selb vnd ir helfer beholfen su^ellent sin vnd^d) sich dez weren vnd retten so^ent, alz verr ir mugen geraichen mach, daran sie wider v^ens noch dem rich niht tůn noch uerschulden so^ent, in chainem weg. Vnd waz sie a^uch fu^erbaz ir notdurft mit vns vnd uor vns ze reden haunt, darvmb su^ellen wir sie gnedclich erho^ern. Vnd darvmb ze ainem offen waren vrchu^end v^enser uorbeschaidener vestnung erniurung vnd bestettung vnd aller uorgeschribner sache geben wir daru^eber der stat vnd den burgern ze sant Gallen disen brief mit v^enserr chu^englicher magestet insigel bevestnet vnd besigelt, dauon chainem menschen múglich noch erlovbt sin sol, die geschrift v^enser uorbeschaidner vestnung erniurung vnd bestettung zerbrechen oder da wider freuenlich ze tůn oder ze komen. Vnd wer daz freuenlich besuhte, der wizz sich in vallent sin mit der getât die vngnad v^enserr chu^englichen magencraft³. Ditz beschah, do man zalt uon Cristes geburt drîuzehenhundert jar vnd darnach in dem nu^en vnd viertzigostem jar, an dem nehsten mentag in der osterwochen.

Source Fulltext: Chartularium Sangallense VII, Nr. 4117*, S. 46-48.