Wir Lvdowig von gots gnaden Romischer cheiser zů allen ziten merer dez richs veriehen || offenlich an disem brief, daz wir dem edeln mann Chunraden hertzogen von^a) Vrslingen¹ schuldik || sein hundert mark silbers vnd hundert pfunt haller vmb die dienst, die er vns vnd dem || reich getan hat, vnd haben im daz selb gelt verschaft vnd verschaffen ez im auch mit disem brief auf vnserer vnd dez reichs gewonlicher stewer zů sant Gallen, also daz er die selben stewer ia^erlich ein nemen sol, als lang vntz er da von gewert vnd beriht wirt der egenanten hundert marck silbers vnd hundert pfunt haller gar vnd gantzlich. Da von gebieten wir dem rat vnd der gemain der stat zů sant Gallen, daz si im wartent sein mit der stewer, als lang vntz er dez vorgenanten geltes da von gewert wirt, vnd swenn si in dann gewert habent, so sagen wir si ledick vnd los mit disem brief. Vnd dar vber zů vrchund geben wir im disen brief mit vnserm insigel versigelten. Der geben ist zů Auspurch, an dem eritag nach Luce, do man zalt von Christes geburt driutzehenhundert jare, dar nach in dem einen vnd dreizzigistem jare, in dem sibentzehendem jare vnsers reichs vnd in dem vierden dez cheisertůms.

Source Fulltext: Chartularium Sangallense VI, Nr. 3467, S. 117-118.