Allen, die disen brief ansehent, lesent oder horent lesen, kúnt ich Hainrich von Eppenberg¹ vnd veriech offenlich, das ich gesworn han || ainen gelerten aide ze den ha|lgen den burgern vnd der stat gemainlich ze sant Gallen, das ich ablan vnd is gelasen han fúr mich vnd fúr min || swo^ester², die Cůnratz se^algin des Horwers³ elichv´ hus fro^vw was, allen den schaden, der mir vnd och ir beschehen ist an der burg ze Eppenberg an lút, an gůt, || was dar zů ho^ert, vnd an allem dem, do ich vnd o^vch si geschadgot sigent von dem rât vnd den burgern gemainlich der stat ze sant Gallen vnd iron helfern, vnd das ich darumbe frúnt bin vnd worden bin bi dem selben aid. Ich nam o^vch vnd han genomen in den selben aid, alle min frúnd ze frúnd gewinen an alle geua^ert. Wa^er aber, das kain min frúnd niht frúnd welt werden, das sol ich den vorgenanten burgern ze sant Gallen kunt tůn vngeuarlich bi dem selben aide. Ich vergich o^vch, das ich gesworn han, den vorgenanten burgern ze sant Gallen ze warten mit der festú ze Eppenberg fúnf jar die ne^ahsten, die koment von sant Gallen tult, die nu kúnftig ist, vnd ze antwurten die selben festen, wenne sú mich aid die sú inne hant von minen we^agen ermanent mit ir brief. Ich han och in den selben aide genomen, die selbun festú ze behu^eten mir vnd inan nutzlich an alle geua^erd. Ich hab o^vch in den selben aide genomen, die Maiger von Alstetten⁴ noch ir helfer niemer ze husen noch ze hofen, mit worten noch mit werchen, mit ra^etten noch mit geta^etten, die wil der krieg wa^erot gen inan. Ich Hainrich von Eppenberg vergich o^vch offenlich, das ich gebetten han min frúnd, die hie nach gescriben stant, hern Lútolt den Schenkken von Landegge⁵, hern Amel von Lutterberg⁶, hern Cůnrat von Haidelberg⁷, hern Cůnrat von Ainwille⁸, hern Cůnrat den Schênken von Landegge⁹ ritter, Albreht von Haidelberg¹⁰, Petern von Lutterberg¹¹, Růdolf den Gieln von Glatburg¹², Růdolf von Annwille¹³, Hansen von Meldegge¹⁴, Burkat^a) von Ainwille¹⁵, Hainrich von Riffenberg¹⁶, Hainrich von Meldegge¹⁷ kne^aht, das sú frúnd sint worden durch min bette der vorgenanten burger ze sant Gallen von der vorgescriben tat wegen. Wir die vorgenanten her Lútolt der Schenk, herre Amel von Lutterberg, her Cůnr. von Haidelberg vnd die andern gemainlich veriehen o^vch offenlich an disem brief, das wir durch Hainr. von Eppenberg da vor genemt bet willen gesworn habin ainen gelerten aide zů den hailgen, vrfeht vmb die vorgescriben^b) sach von Eppenberges vnd siner swo^ester we^agen. Wir die vorgenanten her Lútolt der Schenk, her Amel von Lutterberg, her Cůnr. von Haidelberg vnd die ander gemainlich habent o^vch in den selben aide genomen, bescha^ehe, das Hainrich von Eppenberg da vor genant siner eren vnd sines aides verge^as vmb die getat, als da uor gescriben ist, so haben wir in den selben aide genomen, das wir dem vor gescriben Hainrichen von Eppenberg weder raten noch helfen sont mit worten noch mit werken, mit ra^etten noch mit geta^etten vmb die vorgescriben sach. Vnd das dis alles war sige vnd sta^et belibe, das hie vor gescriben stat^c) an disem gegenwúrtigen brief, so henk ich der vorgenant Hainr. von Eppenberg mit^d) aigen insigel an disen brief. Wir die vor genanten her Lútolt der Schenk, her Amel von Luterberg, her Cůnr. von Haidelberg, her Cůnr. von Ainwille, her Cůnr. der Schenk ritter, Albreht von Haidelberg, Peter von Luterberg, Růd. der Giel, Růdolf von Annwille, Hans von Meldeg, Burk. von Ainwille, Hainrich von Riffenberg, Hainrich von Meldegge kne^aht henken o^vch durch besta^etter vnd merer sicherhaid wegen alle v´nserú aigenú insigel an disen brief. Der geben vnd gescriben ward ze sant Gallen in der stat, do man zalt von gottes gebúrte drúzehen hundert jar, dar nach im ahtoden vnd drizigosten jar, an dem na^ehsten zinstag vor sant Gallen tag.

Source Fulltext: Chartularium Sangallense VI, Nr. 3694, S. 284-285.