Ich^a) Růdolf von Rosenberg ritter genant von Zukkenriet¹ tůn kunt vnd vergich offenlich mit disem brieue fúr mich vnd fúr alle min erben || allen, die in sehent lesent oder ho^erent lesen, daz diz nachgenemten erberen lút Anna, Johansen Milers dez ja^egers elichi tohter, Elzbeth, Jo||hans, Herman vnd Cůnrat irú kint, die si hat bi Johansen Arnolt von sant Gallen, die min lehen warent von dem erwirdigen gotzhus ze || sant Gallen, sich selber mit lip vnd mit gůt vnd mit allen rehten vnd ansprachen, die ich zv^o in hatt ald haben moht, von mir reht vnd redlich geko^vffet hant an daz vorgeschriben gotzhus ze sant Gallen vmb sibenzehen phunt phenning gůter vnd gena^emer Costentzzer múnse, der ich gantzlich von in gewert bin vnd enphangen han vnd an minen offenn nutz bewendet, vnd han o^vch die selben vorgenemten lút Annen Milerinen, Elzbethen, Johansen, Herman vnd Cůnraten irú kint mit lip vnd mit gůt vnd mit allen rehten vnd ansprachen, die ich zv^o in hatt ald haben moht, reht vnd redlich vf geben vnd geuertgot zv^o dez erwirdigen mines gna^edigen herren abt Chůn von gottes gnaden abt dez vorgeschribenen gotzhus ze sant Gallen² vnd zv^o dez selben gotzhus handen, also daz die selben vorgenanten lút Anna Milerin, Elzbeth, Johans, Herman vnd Cůnrat irú kint hinnenhin mit lip vnd mit gůt vnd mit allen rehten vnd ansprachen, die ich zv^o in hatt ald haben moht, an daz vorgeschriben gotzhus ze sant Gallen geho^eren vnd dez reht aigen sin sont. Vnd darumb so han ich mich willeklich verzigen vnd verzich mich mit vrkúnd diz brieues gantzlich vnd gar fúr mich vnd fúr alle min erben der vorgenemten lút mit lip vnd mit gůt vnd mit allen rehten aller aigenschaft aller lehenschaft aller besatzzung aller kuntschaft aller gewer lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben, ob ich enwa^er, an der zv^o der vnd von der vorgenemten lút lip oder gůt von aigenschaft ald von lehens wegen ie gehept han ald hie nach iemer gehaben oder gewinnen mo^ehtint, vnd daz ich noch min erben, ob ich enbin, noch nieman andre an v´nser stat noch von v´nsern wegen die vorgenemten lút an iro lip noch an iro gůt weder von aigenschaft noch von lehens wegen niemer mer súllent noch wellent ansprechen vftriben bekúmberren bekrenken noch in kain wis beswa^eren weder mit gaistlichem noch mit weltlichem geriht nach ân reht noch mit enkainer lay ander sachen ân alle geua^erde. Ich han o^vch gelobt mit miner trúwe vnd loben mit disem brieue fúr mich vnd fúr alle min erben, der vorgenemten lút Annen Milerinen, Elzbethen, Johansen, Hermans vnd Cůnratz ir kind mit lip vnd mit gůt wer ze sinne nach dez landes reht vnd o^vch den vorgenanten minen herren abt Chůn sin nachkomen vnd daz vorgeschriben gotzhus ze sant Gallen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ darumb angesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han. Vnd ze warem offem vrkúnde vnd sta^eter sicherhait aller der vorgeschribenen dinge vnd gedinge so han ich Růdolf von Rosenberg ritter da vorgenemt fúr mich vnd fúr alle min erben min insigel offenlich gehenkt an disen brief. Der geben ist ze Rumanshorn³ an sant Thomas abent dez hailigen zwelfbotten vor wihenna^ehten in dem jar, do man zalt von Cristus gebúrt drúzehenhundert jar, ahtzig jar vnd darnach in dem sibendem jare.

Source Fulltext: Chartularium Sangallense X, Nr. 6230, S. 448-449.