Allen^a) den, die disen brief ansehent lesent oder ho^errent lesen, tůn ich Johans Hoppler von Winterthur¹ || kund vnd vergich offenlich mit vrkúnd dis brieues fúr mich vnd all min erben, das der beschaiden kneht Cůnrat || Frank von Winfelden², der von dem erwirdigen fúrsten minem gna^edigen herren Cůnen von gottes gnaden abt vnd || sinem gotzhus ze sant Gallen³ min lehen gewesen ist, sich selber mit lib mit gůt vnd mit allen rehten von mir vnd minen erben geko^vffet ha^vt an das vorgenant gotzhus ze sant Gallen, von dem och si lehen sint, mit zwaintzig guldin gůter an gold vnd swa^er an der gewiht, der ich von im gantzlich vnd gar gewert bin vnd enpfangen ha^vn vnd an minen offnen nûtz bewendet, vnd han den vorgenempten Cůnrat Franken von Winfelden mit lib mit gůt vnd mit allen rehten fu'r mich vnd all min erben dem obgenanten minem gna^edigen herren abt Cůnen an sin hand zů des vorgeschribnen sines gotzhus handen vff geben geuertgot vnd zů sinen handen braht, als reht sitt vnd gewonlich was, vnd darv´ber so han ich mich verzigen vnd verzihe mich o^vch mit disem brief fúr mich vnd all min erben gen dem obgenanten minem gna^edigen herren abt Cůnen gen sinen nahkomen gen dem obgenanten gotzhus ze sant Gallen vn[d o^v]ch^b) gen des obgenempten Cůnratz Franken lib vnd gůt aller aigenschafft aller lehenschafft aller manschafft aller gewer aller kuntschafft aller besatzzung aller zúgnust lút vnd brief, so ich ietz ha^vn oder von mir ald von^c) minen erben iemer hienach funden werdent, alles rehten gaistlichen vnd weltlichen gerihtes aller vordrung vnd ansprach, so ich ald min erben zů des vorgenempten Cůnratz Franken von Winfelden lib ald gůt ietz gehebt ha^vnd oder hienach iemer me gehaben mo^ehtin in dehain wis. Ich han o^vch gelobt vnd loban mit disem brief fúr mich vnd all min erben, des vorgenanten Cůnratz Franken vnd des ko^vffs reht wer ze sint nach dem rehten gen aller ma^engklichem an gaistlichem vnd weltlichem geriht, wenn sin min obgenampter gna^ediger herr abt Cůn sin nahkomen oder dz vorgenant gotzhus ze sant Gallen vnd o^vch der vorgenempt Cůnrat Frank no^vtdurftig sint, a^vn all geuerd. Vnd des hierv´ber ze offem warem vrkúnd diser vorgeschribner ding han ich Johans Hoppler da obgenampt min aigen insigel fúr mich vnd all min erben offenlich gehenkt an disen brief. Der geben ist ze Winterthur an dem na^ehsten frytag vor sant Agnesen tag in dem jar, do man zalt von Cristi gebúrt drúzehenhundert ahtzig vnd aht jar.

Source Fulltext: Chartularium Sangallense X, Nr. 6240, S. 464-465.