Wir^a) Hans vnd Albreht von Haidelberg¹ gebrůder veriehent mit vrkúnde diz brieues, als vns der hochwirdig fúrst vnser gena^ediger herr abt Cůn || abt dez gotzhûses ze sant Gallen² vnser phandbrief vmb die burge ze Singenberg³ mit allen gu^etern vnd lúten mit aller zůgeho^erde vnd || besunder mit disen nâchgeschribenen gu^etern vnd lúten, dez êrsten item der buwhof vnd die hofraiti ze Singenberg, item die gu^eter vff dem Êbnot⁴, || item die gu^eter vmb Zilschlatt⁵, item die gu^eter ze Sittrendorf⁶, item die múlinon vnd múlistett ze Singenberg vnd ze Sittrendorf, item die gu^eter ze dem Holenstain⁷, item die gu^eter in dem Vndergriess⁸, item in dem Nidrenfelt⁹, item an dem Yberg¹⁰ bi Bischofcelle¹¹ gelegen, item die gu^eter ze Hondannen¹², item die gu^eter ze Gopretzhûsen¹³ mit holtz mit veld vnd mit aller zůgeho^erde, die zů der obgenanten burge geho^erent, wie die genempt sint, wo vnd an welhen stetten die gelegen sint, item twing vnd ban vnd gericht ze Sittrendorf, item so sint diz die lúte, Claus Korber, Els sin husfrow, Hans vnd Wilhelm irú kind, item Růdolf Judas, Hans, Ja^ecli vnd Els sini kind, item Hans Schay, Els sin husfrow, Haini vnd Adelhait irú kind, item Hans Múller von Niderwille¹⁴, Els sin husfrow, V^eli, Ru^edi vnd Haini irú kind, item Adelhait Ru^edis sa^eligen tochter in Binsen¹⁵ mit iren kinden, item Hans Jêger, Cu^eni vnd Adelhait sinú kind, item Ja^ecli Jeger, item Adelhait Binsma^ennin vnd Ja^ecli ir sun, item Katherin Rempin vnd Hans ir sun, item Adelhait Kra^vmerin, item Ma^etzi Schiblerin, Gret vnd Ann ir tohtren, item Els Lútis vnd irú kind, item Hans Lútis, item V^olrich Schay, item Hans Wêrder vnd sin brůder, item Adelhait Wêrderin, item Margareth Wêrderin, item V^olrich Wêrder vnd sini kind, vnd gemainlich alle die lúte vnd gu^eter, die zů der êgenanten burge geho^erent, si sien benempt oder vnbenempt, die vnser recht gewert phand vmb hundert phunt achtzig vnd drú phunt vnd vmb sechs schilling gůter Costentzer phenning von dem êrwirdigen herren abt Herman sa^eligen dez selben gotzhus ze sant Gallen¹⁶ sint, als die zwên brief wol wisent, die wir dârvmb inne hand, ernúwrot hatt, sol man wissen, daz wir oder vnser êrben die selben burg Singenberg mit allen gu^etern vnd lúten, als vor beschaiden ist, vnwůstlich inne haben vnd niessen vnd die lúte nút scha^etzzen sont. Wir bindent o^vch vns vnd vnser êrben mit disem brieue dârzů, wenne vnd welhes jâres der obgenant abt Cůn oder sin nâchkomen koment vnd vns oder vnser êrben die vorgeschribenn hundert phunt achtzig vnd drú phunt vnd sechs schilling phenning Costentzer múnse oder ie zwen gůt haller fúr ainen Costentzer phenning oder aber guldin ald ander múnse, die denn geng vnd ga^eb ist nâch dez landes lo^vff vnd gewonhait, da fúr geben wend, die wir o^vch also nemen sont vnd vns oder vnser êrben der also vor sant Johans tag dez To^vffers weront, so sont wir oder vnser êrben dem selben abt Cůnen oder sinen nâchkomen ainer losunge gestatten vnd der ân verziehen gehorsam sin in alle wise, als vor beschaiden ist, vnd sol inen denne die selb burge Singenberg mit allen gu^etern vnd lúten, als vor geschriben ist, mit twing mit ban mit gericht mit êrschatz mit êrbschaft mit va^ellen mit gela^ess mit holtz mit veld mit wunne mit waide mit aller zůgeho^erde mit ir ja^erlichen zinsen nútzen rechten vnd diensten gantzlich ledig vnd los sin. Bescha^ech aber daz nâch sant Johans tag dez To^vffers, so sont inen die obgenant burge Singenberg mit allen gu^etern vnd lúten, als vor verschriben ist, mit aller zůgeho^erde aber ledig vnd los sin, vnd sont aber die nútze dez selben jâres vns vnd vnsern êrben volgen vnd nút fúro beliben. Wa^ere aber, daz wir oder vnser êrben dâran suwmig wa^erint vnd inen der losunge, als vor beschaiden ist, nút gestatten wo^eltint, wenne sú denne so vil geltes in die múnse ze Costentz, ze Lindow¹⁷ oder gen sant Gallen legent vnd vns oder vnsern êrben daz verkúndent, da mit sol die losunge beschehen sin, vnd sol der vorbenempt abt Cůn oder sin nâchkomen die selben burg Singenberg gu^eter vnd lúte mit aller zůgeho^erde vnd mit ir ja^erlichen zinsen nútzen vnd rechten haben vnd in nemen vnd sont vns oder vnsern êrben dâbi nút schuldig sin ze geben. Vnd dez ze wârem offenem vrkúnde so haben wir obgenanten Hans vnd A^vlbreht von Haidelberg gebrůder baid vnsrú aigni insigel fúr vns vnd vnser êrben offenlich an disen brief gehenket. Der geben wart an der na^ehsten mitwochen nâch sant Gallen tag in dem jâre, do man zalt von Cristus gebúrt drútzehenhundert jâr, achtzig jâr vnd dar nach in dem sechsten jare.

Source Fulltext: Chartularium Sangallense X, Nr. 6154, S. 348-349.