H. divina permissione abbas totusque conventus monasterii sancti Blasii Nigre Silue¹ ordinis sancti Benedicti dyocesis Constantiensis universis presentes || litteras inspecturis caritatis affectum cum noticia subscriptorum. Ne posterorum versutia acta presentium calumpniari valeat in aliqua || sui parte, expedit ea, que geruntur in tempore, ne labantur cum tempore, scripturarum indiciis perhennari. Noverint igitur || universi et singuli, quos nosce fuerit oportunum, quod nos consensu unanimi ac diliberatione prehabita diligenti considerataque utilitate nostri monasterii predicti V^olricum dictum in dem Bach de O^vtoluingen² nobis nostroque monasterio usque ad hec tempora proprietatis tytulo pertinentem cum honor(abili) in Christo H. dei gratia abbate³ et conventu monasterii sancti Galli ordinis prelibati pro Eberhardo dicto de Rossewangen⁴, qui quidem Eberh. iam dictis dominis abbati et conventui monasterii sancti Galli iure pertinet servitutis, permutavimus et tenore presentium permutamus, eundemque V^olricum in prefatos dominos abbatem et conventum monasterii sancti Galli permutationis tytulo transtulimus et transferimus per presentes ad habendum, possidendum et circa ipsum deinceps disponendum, quod ipsorum placuerit voluntati, accedente huiusmodi permutationi sepedicti V^olrici consensu pariter et assensu, renuntiantes pro nobis nostrisque successoribus, qui pro tempore fuerint, omni iuri, quod nobis in prefato V^olrico conpetiit seu conpetere potuit undecumque, adhibitis in premissis verborum et gestuum sollempnitatibus debitis et consuetis. Ut autem dicta permutatio robur obtineat firmitatis, renuntiamus pro nobis nostrisque successoribus scriptis presentibus exceptionibus doli mali, beneficio restitutionis in integrum, litteris a sede apostolica vel aliunde inpetratis seu inpetrandis et generaliter omni auxilio et suffragio legum et canonum, quo mediante premissa permutatio cassari posset seu quovis ingenio quomodolibet inpugnari. Et in evidentiam premissorum nos H. abbas sancti Blasii predictus sigillum nostrum, quo et nos conventus utimur, cum proprio careamus, duximus presentibus appendendum. Datum apud sanctum Blasium, anno domini M°.CCC°.XIIII°. VIII. ydus iunii, indict. XII.

Source Fulltext: Chartularium Sangallense V, Nr. 2891, S. 258-259.