Allen den, den diser gegenwurtiger brief von gesiht oder von geho^ert wirt ze wußen getan, kund ich Rudolf von Landenberg¹ || der kilchher ze Pfephincon², das min her abt Hainrich³ von gottes genaden des gotteshus ze sante^a) Gallen den hof || ze Wulficon⁴, der mit luten vnd mit gůte von abt WiInheIm seligen⁵ des vorgenanden gotteshuß min rehtes pfant || was, vnd enkaines Landenbergers me, von mir erlo^eset hat vo^elleklich vnd ganzelich vmb alles das gůt, dar vmbe der selbe hof vnd die lute von dem vorgenanden herren abt WiInheIm seligen mir versezet warent. Ich vergih o^vch, das^b) ich den vorgenanden hof vnd die lute han vf geben ledeklichen vnd frilichen wr alle mine rehten erben an des vorgenanden herren hant abt Hainriches mit aller der getat, als man ain lediges vnd ain erlo^esetes phant vf geben sol, vnd das ich noch enkain min erbe an das selbe pfant niemer enhain ansprach gewinnen noch gehaben sol vor dehaim rihter, er si gaistelich oder weltelich, vnd das dis war si, so gib ich minem herren dem vorgenanden abt Hainrich disen brief wr alle ansprache min vnd miner erben mit minem ingesigel besigelt ze ainem offennen vrkund aller der dinge, der ich an disen brief wr mich vnd alle min erben veriehen han vnd getan. Diser brief wart geben ze Wil⁶ in dem jare, do von gottes geburte waren druzehen hundert jar, dar nach in dem vierzehenden jare, an dem fritage, der geuallet in dien vier tagen ze angender vastun, vor disen erberen luten, die dises briefes wem vnd gezuge sint, das ist min her grafe Chraft von Toggenburg⁷, der chaplan von Hennov⁸, V^olr. der Giel⁹, Johans der Toßer¹⁰, Růdolf der alt schulthaiß¹¹, Sifrit der schulthaiß, Johans der Goltschmit¹², Johans der Albrehtswiller vnd ander vil erber luton, die dis ding sahen vnd horton.

Source Fulltext: Chartularium Sangallense V, Nr. 2875, S. 249-250.