In^a) nomine domini amen. Per hoc presens publicum instrumentum cunctis ipsum intuentibus pateat evidenter, || quod sub anno a nativitate domini M°CCC°LXXX sexto, ind(ictione) nona, pontificatus sanctissimi in Christo patris ac domini nostri domini || Vrbani digna dei providentia pape sexti anno octavo, decima die mensis ianuarii, hora vesper||arum vel quasi diei eiusdem, in villa Helfentswile¹ Const(antiensis) dyocesis et ibidem in cimiterio ante fores ecclesie parrochialis ville eiusdem in testium meique notarii publici subscriptorum presencia personaliter constituti discreti dominus Johannes Ga^essler de Cella Episcopali² rector ecclesie parrochialis in Helfentswile iam dicte ex una et Lútoldus dictus Schenk de Landegg³ armiger ex parte altera, prefatus dominus Johannes Ga^essler corpore et mente sanus, prout apparuit, animadvertens et considerans, quomodo propter lites gwerras exactiones et abstractiones iniustas et iniquas ubique terrarum iam multipliciter superhabundantes ipse vel aliqua alia ecclesiastica seu religiosa persona extra oppida civitates castra fortilicia et alia loca firmata et munita absque gravi periculo corporis et bonorum suorum vix vel numquam mansionem et domicilium habere possit nisi per auxilium defensionem protectionem et tuitionem potestatis et dominii laicalis et secularis, bona et matura deliberatione sepius, ut asseruit, prehabita se cum corpore et rebus suis omnibus ecclesiamque suam predictam ac fructus redditus et proventus eiusdem defensioni protectioni ac tuitioni predicti Lútoldi Schenken suorumque heredum submisit fideliter quoque conmendavit, promittens se post mortem discretorum Epponis de Eppenstain⁴ armigeri et Margarethe dicte Gielinen⁵ eius uxoris legitime extunc inantea, quam diu rector predicte ecclesie foret, eidem Lútoldo Schenken vel eo non existente suis heredibus omnibus et singulis annis de fructibus et proventibus ecclesie sue predicte solvere et expedire velle et debere ratione tuitionis et defensionis sibi ab eo vel suis heredibus pro eorum posse contra omnem potestatem et iniuriam iniquas faciende et prestande quindecem maltra speltarum quindecem maltra avene unum quartale fabarum unum quartale pisorum et unum quartale lentium vel in casu, in quo in aliquo anno sibi de fructibus ecclesie tantum de lentibus non cederet, unum quartale pisorum pro lentibus mensure oppidi Episcopaliscelle duas pigas veni sine dolo et fraude mensuratas seu honeratas centum manipulos straminis quatuor frusta lini, que wulgariter dicuntur kloben, tali conditione adiecta, si aliquo annorum fructus et redditus supradicte ecclesie ultra conswetum modum ex sterilitate terre aut alia occasione quacumque minorarentur et viliores fierent seu essent, quod eodem anno ipse rector supradictus pro defensione et tuitione premissis prescripto Lútoldo Schenken vel suis heredibus etiam minus de fructibus eisdem pro eorum defensione, quam prenotatum est, dare et persolvere debeat et teneatur, prout tunc quolibet huiusmodi annorum discretum, conveniens et rationi consonum ab hominibus discretis esse videatur seu iudicetur secundum et iuxta quantitatem dampni in fructibus premissis eodem anno passi. Promisit etiam tunc prefatus Lútoldus Schenk presentibusque pro se et heredibus suis singulis et universis firmiter promittit, quod ipse vel eo non existente sui heredes ratione census et stipendii premissorum sibi de fructibus ecclesie predicte pro premissa sua defensione et tuitione annuatim persolvi debitorum medietatem omnium iurium et subsidiorum tam papalium tam episcopalium quam aliorum dominorum et prelatorum quorumcumque ac alias occasione quacumque de ecclesia supradicta et eius fructibus persolvendorum, indilate quavis contradictione cessante omnibus et singulis annis^b) ac omni tempore ad hoc oportuno persolvere et expedire velint debeant et teneantur, pactum validum et solempnem faciens et interponens, si ipse vel sui heredes in expeditione predicte medietatis quovis modo tardi aut neglientes reperti fuerint et ex huiusmodi neglientia seu retardatione prefatum dominum Johannem rectorem excommunicari aut predictam ecclesiam suam interdici vel alias ipsum vel suam ecclesiam quovis modo aliquod dampnum vel periculum exinde incidere seu sustinere contigeret, quod extunc ipse Lútoldus Schenk vel eo non vivente sui heredes eundem rectorem et eius ecclesiam ab excommunicationis et interdicti sententiis et a quolibet alio dampno et periculo exinde passo relevare et indempnes reddere velint debeant et teneantur, et quod supradicto censu et stipendio annuatim eis a predicto domino Johanne rectore, sic ut premittitur, expedito et soluto amplius in et ad dictum rectorem et eius ecclesiam et iura pertinentias fructus redditus et proventus ecclesie eiusdem nichil impetere appostulare et cum eisdem facere expedire et disponere vellent nec deberent quovis modo publice vel oeculte quibusvis ingenio vel colore quesitis, sibi tamen atque suis heredibus iure patronatus prefate ecclesie presentandique rectorem ad eandem integre salvo atque inviolato et illeso permanente. Promiserunt quoque prefati dominus Johannes Ga^essler rector pro se et Lútoldus Schenk pro se et heredibus suis universis et quilibet eorumdem michi notario publico subscripto solempniter stipulanti et recipienti vice et nomine omnium, quorum interest, per fides suas loco et nomine iuramenti corporaliter prestitas omnia et singula in presenti instrumento contenta rata grata atque firma tenere et inviolabiliter observare contraque premissa in toto vel in parte non facere vel venire per se alium seu alios nee hoc fieri procurare, ymmo nec aliquatenus licere directe vel indirecte, exceptioni ingratitudinis doli mali debite solempnitatis non adhibite omnique iuris auxilio canonum atque legum, quibus mediantibus ipsi vel aliquis eorum vel aliquis eorum loco vel nomine mutari^c) facere vel venire posset contra in presenti instrumento contenta vel ipsorum aliquod in genere vel in specie, ex certa scientia pro se et heredibus suis ac omnibus aliis, quorum ratione eorum interest vel quovis modo interesse poterit nunc vel in futuro renuntiantes publice et expresse, adhibitis in premissis verborum et gestuum solempnitatibus debitis et conswetis, et ut de premissis unum publicum instrumentum conficerem, prefate partes me notarium publicum cum instantia requisiverunt. Acta sunt hec anno domini ind(ictione) pontificatu die mense hora et loco prescriptis presentibus probis et discretis viris domino Růdolfo de Rosenberg⁶ milite, V^olrico Kupferschmid alias Wirri sculteto oppidi Wil⁷, Hugone Stirn de Helfentswile et Alberchto Schnider de Obernbúrren⁸ laicis Constantiensis dyocesis testibus ad premissa vocatis specialiter et rogatis. ||
(ST) Et ego Wernherus Decimatoris de Pfullendorf⁹ clericus Constantiensis dyocesis publicus imperiali auctoritate notarius iuratus, quia premissis omnibus et singulis tempore et loco prescriptis una cum prenominatis testibus presens interfui eaque, sic ut premittitur, fieri vidi et audivi, idcirco hoc presens publicum instrumentum manu mea propria exinde scribendo confeci et in hanc publicam formam redegi signoque meo solito et consweto signavi in fidem et testimonium omnium premissorum requisitus, ut premittitur, super eo.

Source Fulltext: Chartularium Sangallense X, Nr. 6122, S. 312-314.