+++ Innocentius episcopus servus servorum dei ad perpetuam rei memoriam +++ || Sedis apostolice providentia circunspecta hiis, que ecclesiarum et monasteriorum ac personarum ecclesiasticarum, presertim que sub regulari habitu continuum exhibent domino famulatum, commoditatem respiciunt, ut illibata con||sistant, libenter consuevit favorem apostolicum impertiri. Exhibita siquidem nobis pro parte dilectorum filiorum Hermanni abbatis et conventus monasterii sancti Galli ordinis sancti Benedicti Constantiensis diocesis petitio con||tinebat, quod dudum per eos venerabili fratri nostro Hainrico episcopo Constanciensi exposito, quod propter tirannidem et invasionem dampnate memorie Ludowici^a) de Bauaria ipsi et dictum monasterium ad tantam inopiam devenerant, quod hospitalitatem tenere et elemosinas facere consuetas nec alia ipsis incumbentia onera supportare nec secundum statum et decentiam ipsius monasterii commode de proventibus ipsius monasterii sustentari^b) valebant, ac per eos eidem episcopo humiliter supplicato, ut parrochialem ecclesiam in Kilchberg cum ecclesia in Rikenbach eidem canonice annexa dicte diocesis^c) de ipsorum abbatis et conventus patronatu existentem ex premissis et aliis rationabilibus causis eidem episcopo expositis eisdem abbati et conventui et per eos dicto eorum monasterio et communi mense ipsorum unire et incorporare perpetuo dignaretur, idem episcopus habitis^d) prius super hoc diversis tractatibus cum dilectis filiis capitulo sue ecclesie^e) Constantiensis de ipsorum consensu ecclesiam predictam in Kilchberg cum dicta ecclesia in Rikenbach sibi annexa cum omnibus iuribus et pertinentiis suis prefatis abbati et conventui et successoribus eorundem ac communi mense ipsorum et per eos monasterio supradicto auctoritate ordinaria imperpetuum applicuit^f), incorporavit, annexuit et univit, prout premissa et alia in patentibus litteris episcopi et capituli predictorum sigillis signatis, quarum tenorem de verbo ad verbum presentibus inseri fecimus, plenius continetur. Quare pro parte dictorum abbatis et conventus nobis extitit humiliter supplicatum, ut applicationem, incorporationem, annexionem et unionem predictas confirmare ex certa scientia de benignitate apostolica dignaremur. Nos igitur prefati episcopi nobis etiam super hoc humiliter supplicantis ac eorundem abbatis et conventus in hac parte supplicationibus inclinati applicationem, incorporationem, annexionem et unionem easdem ratas et gratas habentes illas auctoritate apostolica ex certa scientia confirmamus et presentis scripti patrocinio communimus. Tenor vero dictarum litterarum talis est:||
Es folgt der Text von Nr. 4623.||
Nulli ergo omnino hominum liceat hanc paginam^g) nostre confirmationis infringere^h) vel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Dat. Auinione, III kl. septembr., pontificatus nostriⁱ⁾ anno septimo.

Source Fulltext: Chartularium Sangallense VII, Nr. 4630, S. 463-464.