Wir^a) dis nachgeschribnen Eberhart vnd Albreht von Burglon¹ gebrůder ritter veriehen vnd tůnt kund offenlich || allermenglichem mit disem brief, daz fúr v´ns kam ze Búrglon vf v´nser vestin der erber man Walther Iberger || von Schwartzenbach² vf disen tag, alz dirr brief geben ist, vnd zogt v´ns ainen offnen brief, der besigelt || was mit her Johansen von Stettfurt³ korherren Zúrich insigel, mit demselben brief v´ns der ietzgenant her Johans von Stettfurt ledklich vnd frilich ze v´nsern handen vffgab vnd sand die schůpuzz ze Stettfurt gelegen, die man nempt des Obernherters schůpuzz vnd etwann galt sehs stuk, mit allen rechten nútzen gewonhaiten vnd mit aller zůgeho^erd, die sin lehen von v´ns was, vnd batt v´ns mit demselben brief, daz wir dieselben schůpuzz lihen wo^elten dem obgenanten Walthern Iberger ze rechtem lehen. Vnd nach dem do wir denselben vffsendbrief aigenlich verhorten vnd wol verstůnden, do batt v´ns och do ze stett der egenant Walther Iberger flissklich vnd ernstlich, daz wir im dieselben schůpuzz ze rechtem lehen lihen wo^elten. Dar vmb erhorten wir gna^edklich des obgenanten her Johansen von Stettfurt vnd och Walther Ibergers ernstlich bett vnd lihen do ze stett vnd lihent och baid wissentklich redlich vnd recht mit disem brief demselben Walthern Iberger die obgenant schůpuzz ze Stettfurt gelegen mit allen rechten nútzen zinsen gewonhaiten vnd mit aller zůgeho^erd ze rechtem lehen vnd in lehens wis a^vn geua^erd. Vnd ist dis alles beschehen vnd volfu^ert mit aller gewarsamin worten geba^erden vnd geta^eten, so dar zů von recht ald von gewonhait gehorten nútz ald noturftig warent, a^vn geua^erd. Vnd des alles ze offem vrkúnd der warhait so haben wir baid v´nsrú insigel offenlich gehenkt an disen brief. Der geben ist vf v´nser obgenanten vestin an dem hailgen balm aubent, do man zalt von Cristus gebúrt drúzehenhundert vnd ahtzig jar, dar nach in dem ahtenden jar.

Source Fulltext: Chartularium Sangallense X, Nr. 6255, S. 488.