Allen^a) den, die disen brief ansehent oder ho^erent lesen, kúnd ich Cu^eni Keller von Fulnow¹ vnd vergich offenlich mit disem || brief, daz ich vnd alle min erben, so ich enwa^er, redlich vnd recht schuldig sien vnd gelten sont dem erwirdigen fúrsten || minem gna^edigen herren Cůnen von gottes gnaden abt des gotzhus ze sant Gallen² ald, so er enwa^er, sinen nachkomen zů des || selben gotzhus handen siben vnd drissig pfund pfen(ning) alles gůter vnd gena^emer Costentzer múns ald aber ie zwen gůt haller fúr ainen Costentzer pfen(ning), die dar fúr gena^em vnd ga^eb sint, vnd zehen malter gůter gena^emer vesan Wiler³ messes, dieselben pfen(ning) vnd vesan er mir durch sinen gůten willen von sinen besundren gnaden also bar gelihen vnd mich dero gantzlich bezalt ha^vt, vnd och zwaintzig mut kernen gůtes vnd gena^emes Winterthurer⁴ messes, die ich im schuldig worden vnd beliben bin von versessner zins wegen, vnd wan ich im dieselben geltschuld ietzo inhendes also bar nit ze bezalent ha^vn, so ha^vn ich im dar vmb wissentklich vnd wolbedahtklich versetzt vnd ingesetzt vnd versetzt im och redlich vnd recht mit vrkúnd dis briefs fúr mich vnd fúr alle min erben ze ainem rechten redlichen abniessenden pfand vnd in pfandes wis den zehenden Zúnninkon⁵ mit allen rechten nútzen gewonhaiten vnd mit aller zůgeho^erd, der von demselben minem gna^edigen herren vnd von sinem gotzhus min lehen ist, mit so^elicher gedingd beschaidenhait^b) vnd in dem rechten, daz der obgenant min gna^ediger herr abt Cůn ald sin nahkomen den zehenden mit allen rechten nútzen gewonhaiten vnd mit aller zůgeho^erd inne haben niessen innemen verlihen besetzen vnd entsetzen sont vnd mugent gantzlich a^vn min vnd miner erben vnd a^vn allermengliches von minen wegen sumen ierren vnd widerred alz menig iar vnd alz vil vnd alz lang, vntz daz er ald sin nachkomen also von demselben zehenden vnd von den nútzen der obgenanten geltschuld an pfen(ning) vesan vnd kernen gantzlich vssgericht vnd bezalt sint a^vn geva^erd, vnd fúrbas vnd darnach nit mer vngeuarlich. Vnd des alles ze offem vrkúnd der warhait so ha^vn ich erbetten die fromen man Cůnraten den Saler schulthaissen ze Winterthur⁶ vnd Hainrichen Sigrist burger ze Frowenfeld⁷, daz si irú insigel fúr mich vnd fúr alle min erben offenlich gehenkt ha^vnt an disen brief, wan ich selber aigens insigels nit ha^vn, des och wir ietzgenanten Cůnrat Saler vnd Hainrich Sigrist offenlich veriehent, daz wir von ernstlicher bett wegen des obgenanten Cu^eni Kellers v´nsrú insigel doch v´ns vnd v´nsren erben vnscha^edlich offenlich gehenkt haben an disen brief. Der geben ist an dem na^ehsten fritag nach sant Gregorien tag, do man zalt von Cristus gebúrt drúzehenhundert vnd ahtzig jar, dar nach in dem sibenden jar.

Source Fulltext: Chartularium Sangallense X, Nr. 6172, S. 372-373.