Wir^a) Cůno von gottes gnaden abt des gotzhus ze sant Gallen¹ sant Benedic||ten ordens in Costentzer bistum, daz a^vn alles mittel zůgeho^ert dem stůl ze || Rom, veriehen vnd tůnt kund allermenglichem mit disem brief, daz fúr v´ns || kamen die fromen v´nser vnd v´nsers gotzhus lieben getrúwen dienstlút Hainrich der Giel von Glattburg² vnd Wernli der Giel von Liebenberg³ sin vetter mit dem fromen man Lútolt dem Schenken von Landegg⁴ och v´nser vnd v´nsers gotzhus dienstman, vnd offnoten die vorgenanten Hainrich vnd Wernli die Gieln vor v´ns vnd sprachent, daz der hof ze Spitzenrúti⁵ an Búrrerwald⁶ gelegen halber von inan lehen wa^eri, dieselben manschaft vnd lehenschaft si aber fúrbas von v´ns vnd von v´nserm gotzhus ze lehen hettint, vnd wo^eltent dieselben manschaft vnd lehenschaft des vorgenanten halben hofs vnd allú irú recht zů des vorgenanten Lútolt des Schenken hand bringen vnd vertgen, vnd baten v´ns ernstlich, daz wir dieselben manschaft vnd lehenschaft vnd alle die rechtung, so si an dem vorgenanten hof iendert hettint, von inan an v´nser hand vf nemen wo^elten vnd ze rechtem lehen lihen wo^elten dem vorgenanten Lútolt dem Schenken. Derselben bett haben wir sú wilklich geerot vnd lihent do zestett wissentklich vnd wolbedachtklich vnd lihent och redlich vnd recht mit disem brief dem obgenanten Lútolt Schenken die vorgedachten manschaft vnd lehenschaft des halben hofs ze Spitzenrúti vnd alle die rechtung, so die vorgenanten Hainrich vnd Wernli die Gieln an demselben hof iendert hatten, ze rechtem lehen luterlich a^vn geua^erd. Vnd des alles ze offem vrkúnd der warhait so haben wir v´nser insigel offenlich gehenkt an disen brief. Dar nach veriehen wir obgenanten Hainrich vnd Wernli die Gieln ain gantz warhait aller der ding, so der erwirdig fúrst v´nser gna^ediger herr abt Cůn des gotzhus ze sant Gallen hie vor von v´ns veriehen ha^vt, vnd ze merer sicherhait derselben ding so haben wir och v´nsrú insigel offenlich gehenkt an disen brief. Der geben ist an dem hailgen aubent ze pfingsten, do man zalt von Cristus gebúrt drúzehenhundert vnd ahtzig jar, dar nach in dem sibenden jar.

Source Fulltext: Chartularium Sangallense X, Nr. 6187, S. 386-387.