Ich^a) Hainrich herr ze Hewen¹ vnd frow Clement von Tokkenburg² geborn sin elichi wirtenn veriehent vnd tůnt kunt allermenglichem mit disem brief, || daz fúr v´ns kam hút dis tags, alz diser brief geben ist, der from V^olrich von Lo^enberg wilent her V^olrichs saelgen von Lo^enberg³ ritters elicher sun mit || dem erwirdigen gaistlichen herren abt Walthern von gottes verhengnúst des gotzhus ze sant Johans⁴ in Turtal gelegen sant Benedicten ordens in || Costentzer bistum, vnd ofnot vnd veriach do derselb V^olrich von Lo^enberg vor v´ns vnd sprach, daz er von siner kumberhafti wegen fúr sich vnd fúr alle sin erben redlich vnd recht verkoft hetti dis nachgeschribnen lút Adelhaiten wilent Bertschis Koppen sa^elgen von Zůtzwil⁵ elichen tohter Dietrichs des Giren von Magelsperg⁶ elichen wirt(inn)en, V^olrichen vnd Adelhaiten irú elichen kint mit lib vnd mit gůt vnd mit allen rechten nútzen vnd zůgeho^erden, die sin lehen von v´ns wa^erent, vnd hetti ze koffent geben dem vorgenanten abt Walthern vnd gemainem couent des obgenanten gotzhus ze sant Johans vnd allen iren nachkomen zů desselben gotzhus gewalt vnd handen vmb fúnf vnd zwaintzig pfund^b) alles gůter vnd genemer Italiger haller, dero er och gantzlich vnd gar nach allem sinem willen von inan bezalt wa^eri an den stetten, da er sinen fromen mit geschaffot hetti. Vnd nach der vergicht gab v´ns do zestett derselb V^olrich von Lo^enberg wilklich vnd wolbedahtklich die vorgenanten lút mit lib vnd gůt vnd mit aller zůgeho^erd ledklich vnd frilich vf an v´nser hende vnd verzech sich do zestett vnd verzieht sich och redlich vnd recht mit disem brief fúr sich vnd fúr alle sin erben gen den vorgenanten abt Walthern gen gemainem couent des obgenanten gotzhus ze sant Johans vnd gen allen iren nachkomen vnd och gen demselben gotzhus aller aigenschaft aller lehenschaft aller manschaft aller besatzung aller kuntschaft aller zúgnúst lút vnd brief aller gewer alles gewaltes alles dienstes alles rechten gaistlichs vnd weltlichs gerichts aller vordrung vnd ansprach, so er ald sin erben zů den vorgenanten lúten mit lib vnd mit gůt vnd mit aller zůgeho^erd ie gehatten ald hernach iemerme geha^vn gewinnen ald erwerben mo^ehten von recht ald von gewonhait ald von dehainerlai andren sach wegen. Vnd baten v´ns do mit flissigem ernst der vorgenant V^olrich von Lo^enberg vnd och abt Walther da obgenant, daz wir luterlich durch got dem gůten herren sant Johans ze lob vnd ze eren vnd v´nsern selan ze hail vnd zetrost die aigenschaft manschaft vnd lehenschaft vnd alles daz recht, so wir ald^c) v´nser erben ald v´nser vordem ald nachkomen zů den obgeschribnen lúten mit lib vnd mit gůt vnd mit aller zůgeho^erd ie gehatten ald hernach in dehain wis ald weg iemerme geha^vn gewinnen ald erwerben mo^ehten, ledklich vfgeben vnd v´ns des zů des obgenanten gotzhus ze sant Johans handen vnd gewalt gantzlich verzihen wo^elten. Dar vmb erhorten wir gna^edklich ir ernstlich bett vnd gaben do zestett gemainlich vnuerschaidenklich vnd ainhelleklich mit gůter wissentklicher vorbetrahtung vnd beschaidenhait luterlich durch got vnd dem hailgen herren sant Johans ze lob vnd ze ere vnd v´nsren vnd v´nserr vordern vnd nachkomen selan ze hail vnd ze trost vnd gent och redlich vnd recht mit disem brief fúr v´ns vnd fúr alle v´nser erben vnd nachkomen die aigenschaft manschaft vnd lehenschaft vnd alles daz recht, daz wir ald v´nser erben ald v´nser vordern ald nachkomen zů den obgeschribnen lúten mit lib vnd mit gůt vnd mit aller zůgeho^erd ie gehatten ald hernach in dehain wis gewinnen mo^ehten, an daz obgenant gotzhus sant Johans im Turtal gelegen, also daz der vorgenant abt Walther vnd gemainer couent des ietzgenanten gotzhus vnd alle ir nachkomen von desselben gotzhuses wegen die vorgenanten lút mit lib vnd mit gůt vnd mit aller zůgeho^erd nu hinnan hin iemerme eweklich inne haben vnd niessen sont fúr recht aigen vnd alz ires obgenanten gotzhus aigen lút gantzlich a^vn v´nser vnd a^vn aller v´nser erben vnd nachkomen sumen irren vnd widerred luterlich a^vn gevaerd. Vnd ist dis alles besehenen vnd volfu^ert mit allen worten geba^erden vnd geta^eten, die dar zů von recht ald von gewonhait geho^erten ald nútz ald noturftig warent vnd alz es billich kraft ha^vt vnd haben sol nach recht vnd nach gewonhait nu vnd hernach. Vnd des alles ze offem vrkúnd der warhait so haben wir Hainrich herr ze Hewen vnd frow Clement sin elichi wirt(inn)en da obgenant v´nsrú insigel fúr v´ns vnd fúr alle v´nser erben vnd nachkomen offenlich gehenkt an disen brief. Dar nach vergich ich obgenanter V^olrich von Lo^enberg ain gantz sicher warhait aller diser ding, so die edeln wolerbornen min gna^edigen her Hainrich herr ze Hewen vnd frow Clement von Tokkenburg geborn sin elichi wirt(inn)en da obgenant von mir veriehen hant an disem brief, vnd loben och vesteklich mit demselben disem brief fúr mich vnd fúr alle min erben, der obgenanten lút fúr recht aigen mit aller zůgeho^erd vnd dis koufs des vorgenanten abt Walthers gemaines couents iro nachkomen vnd och des vorgeschribnen gotzhus ze sant Johans recht wern zesint gen menglichem vf gaistlichem vnd vf weltlichem gerichten nach dem rechten, wenn wa ald wiedik si ald dieselben lút des bedurfent ald darvmb angesprochen werdent mit dem rechten vngeuarlich. Vnd des alles ze noch merer sichherhait der warhait so ha^vn ich och min insigel fúr mich vnd fúr alle min erben offenlich gehenkt an disem brief. Der geben ist an dem na^echsten samstag nach sant Peters vnd sant Paulus der hailgen zwelfbotten tag, do man zalt von Cristus gebúrt drúzehenhundert vnd ahtzig jar, dar nach in dem sehsten jar.

Source Fulltext: Chartularium Sangallense X, Nr. 6148, S. 340-342.