Wir herzo^vg Herman von Tek¹ obresta schenk des gotzhus ze sant Gallen veriehen offenlich an disem || brief allen, die in ansehent lesent oder ho^erent lesen, daz Oberndorf² dú stat vnd lút vnd gu^eter vnd was || darzů geho^ert, der hof ze Oberndorf ennent dem Nekker³ bi der kilchen gelegen, daz tal, das man nemmet || Lutenbach⁴, daz gůt, daz man nemmet Hegniberg⁵, vnd alle die lút vnd gu^eter, so zů den selben gu^etern geho^erent, zů des vorgenemten gotzhus schenkenampt geho^erent vnd haft sint, vnd daz wir daz selb schenkenampt mit allen den vorgeschriben gu^etern vnd lúten vnd mit allen rehten, so zů dem selben schenkenampt geho^erent, von dem erwirdigen fúrsten v´nserm gena^edigen herren abt Georien abt dez gotzhus ze sant Gallen⁶ ze lehen enpfangen haben vnd im dauon gesworn, sinen vnd sines vorgeschriben gotzhus fromen ze fúrdern vnd schaden ze wendenn vnd von dem vorgeschriben schenkenampt vnd den lehenn ze tu^enne, als ain man von sinem ampt vnd von sinen lehenn billich tůn sol, vnd ob wir siner lehen fúrbas innen wrdin, daz wir im die sagen súllen ân alle geua^erd. Vnd dez alles ze ainem o^vffen vrkúnd vnd ganzer sicherhait so haben wir v´nser insigel gehenket an disen brief. Der geben ist ze Wîl⁷ in des vorgenemten gotzhus stat an sant Bartholomeus des zwelfbotten abunt in dem jar, do man zalt von gottes gebúrt drúzehenhundert jar vnd darnach in dem ain vnd sechzigosten jare.

Source Fulltext: Chartularium Sangallense VII, Nr. 4761, S. 562-563.