Allen denen, die disen brieff sehend oder hörend lesen, kinden wir graue Hartman von Werdenberg¹ für vns vnd für vnser erben vnd nachkomen offentlich an disem brief, das wir vns verziehen haben vnd ze kauffen haben geben vnserm lieben aeham graf Fridrichen von Dockenburg² vnd sinen erben die graufschafft vnd alle die lehen vnd rechtung vnd gerichte, zwing vnd pänne, lüte vnd gut, gesuchets vnd vngesuchtes, wie daz genemt ist, in Brettengöw³ von Fragenstein⁴ vnz an Talvaz⁵ mit alle der rechtung, als es die von Aspermont⁶ an uns und von vnsern vordern herrn^a) habent braucht, vnd alle die rechtung vnd ansprache, die wir vnd vnser vordren daran habend gehebt oder vnser nachkommen jemer daran möchten gewinnen, an allem^b), was in des von Mätsch⁷ teil ist, was rechtung wir darzu haben, die behalten wier vns selber vnd vnsern erben, ouch ßüllen wir der vorigenant graue Hartman von Werdenberg vnd vnßer erben des wür^c) sin des vorgeschribnen graue Fr. von Dockenburg vnd siner erben nach rechte, vnd ßüllen och im vnd ßinen erben das vertigen vnd versprechen an allen den stetten, da der egenant graue Fr. von Dogckenburg vnd sin erben des notdürfftig ßind. Vnd des ze vrkund vnd einer meren Sicherheit aller der dingen, so hieuor geschriben stand, hencken wir der vorgeschr. graue Hartman von Werdenberg vnser eigen insigel offenlich an disen brieff vnd bitten auch vnsern bruder graue Rudolffe von Werdenberg⁸, den man nennet von Sargans⁹, dz er sin insigele hencke an disen brieff .... vnnße^d) ze einem vrkunde der vorgeschribenen reden. Wir der vorgenannt grauff Rudolf von Werdenberg, den man nennt von Sargans, veriehen öch an disen brieff, das wir aneth^e) betten willen deß vorgeschr. vnsers bruder grauf Hartmans von Werdenberg vnser eigen insigel offenlich gehenckt haben an disen brieff. Das geschah vnd ward direr brieff geben zu Wesen¹⁰ an sant Gertruiden tag, do von gottes geburde warend trüzehnhundert vnd vierzig jaur vnd darnach in dem achtenden jaure.

Source Fulltext: Chartularium Sangallense VII, Nr. 4077, S. 10.