Allen, die disen brieff sechend oder ho^erend lesen, tůn ich V^olrich der Giel von Glattburg¹ kunt vnd vergich offenlich an disem brieff fúr mich vnd min erben, dz ich mit gůter vorbetrachtung dem bescheiden Johans Wildrich burger ze sant Gallen recht vnd redlich ze kouffen geben han den vierden teil des gůtes, dz man nempt des meyers hoff, gelegen ze Flawil², mit akern mit wisen mit holtz mit veld mit allen rechten nútzen vnd gewonheiten vnd mit aller zůgehord a^vn dú gericht, die ich úber dasselb gůt vnd úber andre gu^eter ze Flawil han. Also han ich im den vorgenanten vierden teil ze ko^vffen geben vmb siben vnd drissig pfund pfenning Cost(entzer) múntz, der ich gantzlich bezalt bin vnd in min offen nutz bekert han, den vorgenanten vierden teil des vorgenanten gůtz han ich im gefertgot mit des erwirdigen mines gnedigen herren hand abt Herman des gotzhus ze sant Gallen³, als recht sitten vnd gewonheit was. Ich vnd ouch Heinrich der Giel⁴ min brůder haben ouch dem vorgenanten Johans Wildrich gelopt mit gůten trúwen, das wir vnd v´nser erben sin vnd siner erben recht weren sond sin nach recht vmb den vorgenanten vierden teil des vorgenanten gůtes gen mengklichem an geistlichem vnd weltlichem gericht vnd wo si des notdurfftig sind, vnd wie si da von ze schaden ka^emint, ob wir dz nit ta^etind, den schaden so^ellen wir im gantzlich ab legen vnd ab tůn. Vnd ze vrkúnd so henk ich V^olrich der Giel min insigel an disen brieff fúr mich vnd min erben. Ich Heinr. der Giel da vorgenant vergich einer gantzen warheit alles, so von mir an disem brieff geschriben stat, vnd dz ich den vorgenanten Johansen Wildrichen ze einem gemeinder genomen han v´ber dz, das zů dem vorgenanten vierden teil des vorgenanten gůtes gehort vnd noch nit geteilt ist. Vnd ze merer sicherheit henken ich ouch min insigel fúr mich vnd min erben an disen brieff. Der geben ist an mentag nach Mathye apostoli nach gotz gebúrt drúzehenhundert vnd im acht vnd vierzigosten jare.

Source Fulltext: Chartularium Sangallense VII, Nr. 4074, S. 8.