Allen, die disen brieff ansechent oder ho^erent lesen, tůn ich Johans Wildrich burger ze sant Gallen kunt vnd vergich offenlich an disem brief fúr mich vnd min erben, das ich dem erbern wolbescheiden V^olr. dem Giel von Glattburg vnd sinen erben, ob er enwere, von sunderbar frúntschaft wegen die gnad han getan mit disem brieff, wer dz er ald sin erben, ob er enwer, den vierden teil des gůtes, dz man nempt des meyers hof, ze Flawil gelegen, den ich vmb in vmb syben vnd drissig pfund pfenning Cost(entzer) múntz gekoufft han, von nu dem nechsten sant Johans tag ze súngichtung innrent den nechsten vier jaren widerkouffen wo^eltind, so sol ich vnd min erben, ob ich enwer, dem vorgenanten V^olr. Giel vnd sinen erben den vorgenanten vierden teil des vorgenanten gůtes vmb syben vnd drissig pfund Pfenning guter Cost(entzer) múntz a^vn allen fúrzug wider ze kouffen geben vnd fertgen mit vffgeben vnd mit andern dingen, als si sin notdurfftig sind, vnd wenn si den kouff inrent den vorgenanten vier jaren vor sant Johans tag tůnd, so sol in der nutz von dem vorgenanten gůt gefallen sin, wer aber, dz si den kouff nach Joh. ta^etind, so sol der nutz von dem vorgenanten gůt des jars mir vnd minen erben gefallen sin. Vnd ze vrk(únd) so han ich dem vorgenanten V^olr. Giel fúr mich vnd mine erben disen brief besigelt geben mit minem eigen insigel. Der geben ist an zinstag nach Mathye apostoli nach gotz gebúrt drútzehenhundert vnd viertzig jare, dar nach in dem achtenden jare.

Source Fulltext: Chartularium Sangallense VII, Nr. 4075, S. 8-9.