Wir Chv^onr. von gotz genaden abt des gotzhvs ze den Einsidellen vergehen offenlich fv´r vns vnd fv´r alle vnser || nachkomen, als grave Johs. von Habspurg mit sinen burgern von Rapreswile vnd mit andern sinen helfern vnd dienern in vnsers || gotzhvs burg ze Pfeffinkon gevallen waz vnd dar vs namen win korn klein vnd gros, waz wir vnd vnser gotzhvs an gv^ete || da hatten, vnd vns dar zv^o vieng vnd gen Rapreswile gevangen fv^orten, des wir alles komen sin ze einer richtvng vf die vesten manne hern Herman von Landenberg den alten, hern Johs. von Fro^vwenvelt rittere vnd vf Rv^od. Brv^n den burgermeister Zv´rich, vnd nach der selben drijer richtvng vnd vssprvche so sin wir vnd vnser frv´nde gv^ote vnd lvter frv´nde worden ane geverde graven Johs. von Habspurg der . . burger von Rapreswile vnd aller der, so vns viengen ald vnser burg hvlfen entwerren vnd vnser gůt genomen hant, vnd mit namen aller der, so an der getat schvlde hant, vnd svln in dar zv^o die andern vnser frv´nde ze frv´nden gewinnen, die noch nicht frv´nde worden sint, so verre wir mvgen, ane alle geverde. Welher aber den vssprvch vnd die richtvng, so die vorgenanden erbern manne mit ir offennen brieven vsgeseit hant, gen vns noch gen vnserm gotzhvs nicht volfv^eren noch stete wolten han, der sol in diser sv^one gen vns vnd gen vnsern frv´nden helfern vnd diener vsgelassen sin gantzlich in aller der wise, als der brief des vssprvches der richtvng geschriben stat. O^vch svln wir graven Johs. von Habspurg sinen helfern vnd diener vnd den andern, so da bi waren, do vns ze Pfeffinkon an libe vnd an gv^ote v´bel geschach, vnsern brief vnd insigel geben, daz si von der getat wegen vsser banne komen mvgen, vnd da mit versorgen, als o^vch die drije ald der mere teil vnder den, so diser sachen vsrichter gewesen sint, zitelich dvnket ane geverde. Vnd her v´ber ze einer warheit vnd offenn vrkv´nde so han wir vnser insigel offenlich gehenket an disen brief. Ditz geschach Zv´rich an dem nechsten dornstag nach sant Johs. tag ze sv´ngichten in dem jare, do man zalte von gottes gebv´rt drv´cehen hvndert vnd viertzig jar vnd dar nach in dem achtoden jare.

Source Fulltext: Chartularium Sangallense VII, Nr. 4090, S. 22-23.