Ich her Johs. von Sternegge¹ ritter tv^on mangelichem ze wissenne mit disem gegewúrtigen brieue, || daz V^olrich von Matzingen² zů mir kam gen Rinegge³ in die stat vnd batt vnd warb an mich, || daz ich diente mit etwie mangen ze rosse minem herren grauen Johs. von Habspurg⁴ vnd gen || Roschach⁵ zů im kême, da solte dú samnunge werden, do wart ich in fragende, war die reise gan solte vnd vber wen, wan si mo^echte an solich stette gan, ich diente, vnd an solich, daz ich es nicht tête, do sprach er, si gat nicht an solich stette, da ir widersagens bedurfent, do sprach ich zů im, ich wande, dú soltest gen Gosso^vwe⁶ reisen, wilt du danne daz lant vf reisen, do sprach er, si gat v´ber keinen herren noch edeln man in dem lande, vnd tůnt es dester gerner, wan die reise an solich stette gant wirt, daz ir vnd alle, so die reise varent, dest tv´rer mugent werden, vnd also sprach ich, daz ich gerne dienen wolte, ob es vber keinen herren ze Kurwalhen⁷ gienge, wan wider die wolte ich nicht tůn. Ich sprach o^vch, daz ettelich, so ich mit mir bringent wurde, villicht hern Herman von Landenberg⁸ entsessen, do sprach aber der von Matzingen, si durfent in nicht furchten, wan er wirbet vmb die selben sache als vast als der graue von Habspurg. Er erwarb o^vch an graf Albrecht von dem Heiligen Berg⁹ den jungern vnd batt in ze grauen Johans wegen von Habspurg, daz er im, so er beste mo^echte, die reise geraten vnd behulfen were, do wart graf Albrecht in fragende, war sin o^ehein von Habspurg reisen wo^elte. Daz wolt im der Matzinger nicht sagen vnd sprach, herre, ir durfent keine vorchte haben, daz ez vwer frúnde ald die stette keine ennent dem Bodense angange. Do sprach der graue, aber es mo^echte an solich stette gan, da ich minem o^ehein gern behulfen were, vnd an solich, daz ich es nicht tête, vnd doch lobte er im drije oder viere ze lichenne, vnd do ich dem Matzinger minen dienst verhiesse. Do warb ich an grauen Heinr. von Hohenberg¹⁰, daz mir der etwie mangen ze rosse liehe, daz wolte er o^vch han getan. Vnd dar vmb han ich sider von erbern lúten vernomen, daz ich weisse fúr war, daz die sammenung, so der Matzinger tete ze grauen Johans wegen von Habspurg vnd o^vch hern Herman von Landenberg ze sin selbes wegen, daz die alle solte sin gangen v´ber . . den burgermeister . . den rat vnd die burger gemeinlich von Zúrich. Vnd do ich daz also verhorte vnd gantzlich erfůr, do wolt ich da hin nicht dienan vnd widerbot graf Heinr. von Hohenberg ze siner diener wegen die reise. Vnd wil o^vch ich diz alles, so vor von mir geschriben stat, dez burgermeisters . . dez rates vnd der burger von Zúrich recht wer sin vnd vnder o^vgen komen, wa oder wanne ald an weihen stetten si dez notdurftig sint. Vnd her v´ber ze vrkúnd vnd ze einer waren sicherheit so gib ich dem burgermeister dem rat vnd den bvrgern von Zv´rich disen brief mit minem ingsigel offenlich besigelt. Der geben wart an dem nehsten samstag vor sant Martis tag, in dem jare, do man von gottes geburt zalte druzehen hundert vnd vierzig jar vnd dar nach in dem nv´nden jare.

Source Fulltext: Chartularium Sangallense VII, Nr. 4150, S. 75-76.